1. IMAGINATIO, pro Imago, seu sigillum, sic dictum, quod ejus cujus erat præferret imaginem. Charta Friderici I. Imp. apud Ughellum in Episc. Bobiensibus sic clauditur :

In hujus ceræ materia pro sigillo expressa nostri vultus Imaginatio.

Chronicon Bonæ Spei 4 :

Ut hæc præfata traditio inconcussa permaneat, subsignato canonico testimonio, immo apposita sub Imaginatione nostra, hujus nostri decreti paginam confirmavimus.

Rursum occurrit pag. 10. et tom. 3. Gall. Christ. col. 23. Instrum. Charta Odardi Camerac. Episc. ann. 1108. apud Miræum tom. 1. pag. 81 :

Quæ bona ne tradantur oblivioni, nostri sigilli Imaginatione signamus.

Altera Manassis ejusdem urbis Episc. ann. 1096. laudato tom. pag. 165. col. 2 :

Ut hæc nostra Charta indissolubilis permaneat, sigilli nostri Imaginatione firmata est.

Similia leguntur in Charta Nicolai successoris ann. 1142. tom. 5. Gall. Chr. col. 296.