LAGAMANNUS, Legalis, homo legis, non exlex : ex Saxon. Lagh, Lex, et Man, homo ; Lahman, in Senatusconsulto de Monticulis Walliæ cap. 3. apud Lambardum. Judices vel scabini sunt Phillipsio de Jur. Angloss. not. 543. et Thorpio in Glossar. voce Lahman. Leges Edwardi Confess. c. 38 :

Postea inquisisset Justitia per Lagamannos et per meliores homines de burgo vel de villa.

Domesdei :

Comes Picot... habet hereotum de Lagemannis, 7. lib. et 1. palefridum et arma unius Militis.

Apud Edwardum Cokum ad Littletonem sect. 73. lego,

Lageman, i. habens socam et sacam super homines suos,

seu juris dicendi potestatem : atque ita hanc vocem accipi debere censet Somnerus in Glossario Saxonico, Thainos nempe seu Barones, qui Socam et Sacam habent. De Lagemannis Danicis agit Jus aulicum Norvegicum vetus cap. 33. et ejus interpres Janus Dolmerus, ut et Joan. Stiernhoockus lib. de Jure Sueonum vetusto pag. 18. 34. et alibi. Vide Legalis.