MATHEMATICI, Genethliaci, Chaldæi, qui, ut ait Gellius lib. 14. cap. 1.

de motu deque positu stellarum dicere posse, quæ futura sunt, profitentur

. Ibid. lib. 1. cap. 9 :

Vulgus, quos gentilitio vocabulo Chaldæos dicere oportet, Mathematicos dicit.

Unde colligitur, Gellii ævo vocem hanc vulgi tantum fuisse ac novitiam. S. Augustin. lib. 2. de Doctr. Christ. cap. 21 :

Neque illi ab hoc genere perniciosæ superstitionis segregandi sunt, qui Genethliaci propter dierum natalium considerationes nunc autem vulgo Mathematici vocantur.

Alcuinus lib. de Divin. Offic. :

Astrologi dicti, necnon Genethliaci propter natalium considerationes.... hi vulgo Mathematici appellabantur.

S. Audoenus de Vita S. Eligii :

Mathematici spernendi, auguria perhorrescenda, somnia contemnenda, etc.

Adde Rabanum lib. 3. de Instit. Cleric. cap. 16. Sidonium lib. 8. Epist. 11. et ibi Savaron. Sic Μαθηματιϰοὺς usurpat Concilium Laod. can. 36.