MEDIAVITA. Concilium Coloniense ann. 1310. can. 21 :

Prohibemus item, ne in aliqua Ecclesiarum nobis subjectarum imprecationes fiant, nec decantetur Mediavita contra aliquas personas, nisi de nostra licentia speciali : cum nostra intersit talia discutere, quando sint talia facienda.

Joan. Hocsemius in Adolpho Episcopo Leod. cap. 23 :

Cœperunt Ecclesiæ Ducem maledicere, et Media vita canere contra ipsum.

Albertus Stadensis, et Hist. Archiepisc. Bremensium ann. 1234 :

Clerus qui eminus astans rei exitum expectabat, Media vita, et alia miserationis carmina cum mœrore canebat.

Ubi intelligitur Prosa illa Lamentationis, quam fecisse Notkerum Balbulum Sangallensem tradunt, cum in Martinsdodel pons in loco præcipiti et periculosissimo ædificaretur.

Media vita in morte sumus, quem quærimus adjutorem, nisi te, Domine, qui pro peccatis nostris juste irasceris

. Exstat apud Canisium tom. 5. Antiq. lect. pag. 770. Canitur autem illa Antiphona in Sabbato Dominicæ tertiæ Quadragesimæ in Completorio. Vide Durandum lib. 6. Ration. cap. 52. num. 5. 6. Ordinarium Ord. Præmonstr. pag. 904. et in voce Reliquiæ.