Messegaria, pro Districtu, juris dictione et officio Messegarii, quia messium custos : Jus etiam instituendi Messegarios. quod ne inter viliora officia, rem ex temporibus nostris æstimantes, reputemus, observandum illud inferiores quidem judices spectasse, uti videre est in v. Messegarius, eorum tamen jurisdictionem æquiparari Senescallorum aut præpositorum regalium potestati. Tolosæ vero Messegaria dicitur quoddam territorium quod Capitalium jurisdictioni subest, idem quod aliis banleuca nuncupatur.

Messageria, Eadem notione. Charta ann. 1360. tom. 1. Hist. Dalphin. pag. 149 :

Donamus et concedimus officium Mandatariæ seu Messageriæ Quadratii et ejus mandamenti cum debita et solita perceptione emolumentorum addictum officium quomodolibet pertinentium.

Idem ergo Messagerius, qui Mandatarius, quam vocem consulas licet, ut quid sit Messageria plenius noscas.

Messegaria, Mulcta quæ messegario exsolvitur ab eo cujus animalia in damno inveniuntur, quæ quidem ab alia qnam in emendationem damni exigebant, distinguitur, in Sententia arbitrali ann. 1292. inter abbatem et consules de Gimonte :

Dicti Pastores et alii conductitii solvant Messegariam et emendent talam sive damnum, ut alii homines dictæ villæ ; ita tamen et hoc excepto quod animalia dictorum dom. abbatis et conventus, vel ea quæ dicti pastores cum ipsis tenuerint, dictam Messegariam minime solvere teneantur, sed tenebuntur talam tantummodo emendare.

Pluries ibi. Vide Messegarius.

Messegaria, Præstatio, quæ fit pro custodia messium. Charta ann. 1299. in Lib. rub. Cam. Comput. Paris. fol. 171. r°. col. 1 :

Item percipiebat terciam partem Messegariæ, quæ fuit extimata valere sexaginta solidos Turon.

Vide supra Messagium 2.