NOVENARIUM, ut Novena 1. Hispan. Novenario, Gall. Neuvaine. Testamentum ann. 1286. tom. 2. Hist. Dalphin. pag. 61 :

De quibus (10000. solidis coronatis) volo fieri dictum lectum meum et exequias meas et Novenarium meum, etc.

Constitutiones Cardinalis de Mendoza tom. 4. Concil. Hispan. pag. 32 :

Item pro Novemdialibus et Missis Novenarii ac responsoriis et pro adeundo sepulturam singulis Novemdialibus, Clerici ecclesiæ in qua adest sepultura et sepultus defunctus, percipere debeant 150. Morapetinos pro suo labore.

Ibid. pag. 33 :

Ut in Novemdialibus exequiis et initio anni, quando celebrantur in civitate in quacumque parochia, Clerici seu Presbyteri hujus parochiæ debeant recitare officium duplex et percipere pro suo labore, ut in die sepulturæ, pro quolibet officio.

Et mox :

Quando aliquis parochianus obierit et sepeliri jusserit in monasterio Religiosorum... Presbyteri dictæ parochiæ percipiant ratione laboris 300. Morapetinos, et dicant prima officia, videlicet Litanias, Vigiliam et Missam, et ulterius percipere debeant dicti Clerici pro Novenario, initio anni et Novemdialibus 300. Morapetinos.

Quibus in locis Novenarium inter et Novemdialia discrimen apparet, in eo forte situm, quod Novenarium fuerint Missæ per novem continuos dies celebratæ, Novemdialia vero totidem officia feralia iisdem novem diebus continuis peracta. Vide Novenàium.