1. ORACULUM, Ædes sacra, in qua oratur. Will. Brito in Vocabulario MS. :

Oraculum, dicitur Propitiatorium, unde Exodi 38. Deus fecit Propitiatorium, i. Oraculum. Et in eodem sensu accipitur fere per totam Bibliam..... tamen pro templo potest accipi, etc.

Plinius lib. 12. cap. 23 :

Ab Hammonis Oraculo, juxta quod gignitur arbor.

Vita S. Desiderii Cadurcensis cap. 8 :

Ædificavit etiam aliquando procul a majore Ecclesia sub intervallo trium domiciliorum elegans Oraculum vivo opere, miraque volutione constratum.

Theodorus Campedon. in Vita S. Magni cap. 26 :

Repererunt ibi Episcopum in Oraculo suo, sedentem et orantem.

Vita S. Jacobi Episcopi Tarantasiensis cap. 1 :

Oraculum constituunt, cellamque ædificant.

Fortunatus in Vita S. Medardi cap. 3 :

Cum ad templorum Oracula.... discurreret.

Utuntur Gregor. M. in Dial. Anastasius in Vitis PP. pag. 60. 90. 181. Vita S. Domitiani, Paulus Warnefr. lib. 4. cap. 48. 59. Lex Long. lib. 3. tit. 1. § 17. Pipin. 1. Capitul. Caroli M. etc.