1. ORDINATUS, Ordine sacro donatus. Vide Ordo 3.

2. ORDINATUS mori dicitur, qui testamentum confecit, apud Willelmum Tyrium lib. 12. cap. 25. Vide Inordinatus.

3. ORDINATUS, Idem, ut videtur, qui Advocatus, defensor, Gall. Avoué. Chronicon Farfense apud Murator. tom. 2. part. 2. col. 660 :

Molestiam non facient, nec facere permittent ; sed adjuvabunt nos nostrosque Ordinatos ad retinendam eamdem ecclesiam S. Salvatoris cum rebus sibi pertinentibus, et omnia alia bona S. Mariæ, et suum honorem contra omnes homines.

Et col. 667 :

Quidam Benedictus prior ecclesiæ S. Martini super vallem Transaquam, suscepit a domno Beraldo abbate ecclesiam S. Rufini de Vocabulo Ratino, cum omnibus ejus pertinentiis, ad meliorandum, ab anno Domini MCXII. usque ad XXX. annorum expletionem ; et ibi sit semper Ordinatus noster, quem nos proponimus, et ad jus nostrum liberrime consistat in ipsa ecclesia S. Rufini, et annualiter perfectorum piscium duas salmas in festivitate S. Benedicti vel Ascensione afferant hic nobis.

Vide supra Ordinator 2.

4. ORDINATUS, Institutus, stabilitus. Chronicon Farfense apud Murator. tom. 2. part. 2. col. 665 :

Ecclesiam, quæ est in plaja subtus ripam, offerrent Deo et Salvatori Domino et perpetualiter liberam redderent. Insuper servis servorum Dei monachis ibidem Ordinatis, in persona domni Beraldi abbatis ecclesiæ S. Mariæ Pharphensis, in suisque posteris disponendam concederent.

5. ORDINATUS. Ordinati, Posteri, postgeniti, successores, qui ordine descendunt ab alio, Gall. Descendans, et, ut Practici nostri loquuntur, Aïans cause. Charta Guillelmi de Rupibus Senescalli Andegav. ann. 1209. pro fundatione Abbatiæ Perrodii novi, apud Menagium Histor. Sabolii pag. 365 :

Religiosi non solvent (rachatum) dictis Guillelmo et Margaretæ (uxori,) vel heredibus suis, vel ab ipsis Causam habentibus vel habituris, in mutatione cujusque Abbatis, etc.

Charta Unfredi Comitis ann. 1085. pro Monasterio S. Michaelis de Monte-Caveoso, tom. 5. Annal. Benedict. pag. 666. col. 2 :

Ut nec ego, vel mei heredes, aut Ordinati audeamus ab eis quærere datum, aut servitium vel angariam seu plazzam erga nos exigere.... Præterea et nec monachum quemlibet præfati cœnobii S. Michaelis, aut clericum vel laicum et de ejus pertinentiis, ut nec ego vel mei heredes, seu quilibet noster Ordinatus, aut comprehendere vel tenere eum audeamus... et ut generaliter dicamus, nec in vobis vel vestris monachis, clericis vel laicis, aut omnibus hominibus, prædicto sacro pertinentibus monasterio, potestatem aliquam judicandi, distringendi, aut comprehendendi servamus nobis aut nostris heredibus seu Ordinatis... Si vero instigatione diabolica hoc, quod modo nos pro salute animæ concessimus, sive ego, sive quilibet noster heres, vel successor aut Ordinatus, nec non quispiam hominum disrumpere tentaverimus, aut irritum facere, etc.

Charta Constantiæ uxoris Boamundi Principis Antiocheni pro eodem Monasterio ann. 1124. ibidem pag. 668. col. 1 :

Hæc itaque omnia superius declarata concessimus Deo et monasterio S. Archangeli.... atque confirmavimus habere, tenere et possidere ac dominari in perpetuum, absque omni nostra nostrorumque heredum et successorum et Ordinatorum nostrorum contrarietate et molestia.

Vide mox Ordinium.