PANTERA, Panteria. Vetus Notitia ex Tabular. B. M. de Argentolio fol. 59 :

xix. sol... super stallum in Pantera B. Dionysii.

Sugerius de Administr. sua cap. 1 :

Triginta quinque (solidos) de censu stallorum pistorum in Pantera..... refectioni fratrum apposuimus.

Idem Suger. de Consecrat. Eccl. S. Dion. :

Exeuntes per plateam, quæ Panteria, eo quod inibi omnia emptioni et venditioni teruntur, antiquitus vocitatur, etc.

Ubi habes vocis originem, haud multum certam. Hoc forum Panetiere hodie dicitur, quod a vendito ibi pane duci posset. Huic etymo favet prior locus ipsius Sugerii. Vide Panthera 2.

1. PANTHERA, Retis species, qua capiuntur anates. Describitur a Petro Crescentio lib. 10. de Agricult. cap. 17. Normanni inferiores Pantiere vocant Rete quo capiuntur aves maritimæ. Salmasius de Usur. pag. 352 :

Πανθὴρα, genus est retis, quo omne genus minutarum avium capitur ; ut πανάγρα, quo piscium omne genus.

Vide Lexicon Martinii.

2. PANTHERA, Tentorium, sub quo merces in publicis locis venum exponuntur ; quod in modum retis panthera dicti efformatum esset, forte sic dictum. Statuta Astens. cap. 71. fol. 62 :

Item quod aliqua persona vendere volens aliquid in mercato de sancto non possit ibi tenere seu teneri facere nisi tabulum unum seu bancham unam longam et longum una teysa, et copertum de una tenda seu Panthera tolle.

Vide Pantaleria et Pantera.

3. PANTHERA, Machina bellica triangularis, ferramentis acutis instructa, ut quidquid obvium datur transfigat : unde vocis origo. Hanc sic describit Guido de Vigev. Ms. de Modo expugn. T. S. cap. 13. cujus titulus :

De modo faciendi artificia sive Pantheram pro retinendo magnas gentes cum modica gente in exercitu. Panthera sic fiat : accipiantur tot assides, quot voluerimus Pantheram facere longam, scilicet brachia quinquaginta, vel centum vel ducentas, et sint longæ brachia quinque pro asside et conjungantur insimul cum axis ferri intus et extra,.... et taliter sint conjunctæ ante, quod pars posterior aperta possit dilatari ad voluntatem eorum, qui erunt intra Pantheram ; et quælibet assis habeat unam archeram et unum baculum pro podio ipsius Pantheræ et unum anulum, et cum ipsis baculis et anulis stantes in Panthera possint ipsam ubique aportare et aperire, et ponantur de intus duæ perticæ per longitudinem Pantheræ, scilicet una pro parte, ut assides super ipsis possint ligari, et Panthera sic erit rigida et firma. Et si timeretur propter altitudinem alicujus domus, ne stantes intra Pantheram læderentur, cooperiatur Panthera de cultris supra scriptis taliter, quod non impediant Pantheram claudere et aperire : ....... sed in qualibet asside ponatur unus alter anulus a capite parvus, pro aplicando cultros vel assides necessarias pro defensione lapidum ; ..... et de retro Pantheræ ponantur duæ perticæ taliter positæ, quod teneant Pantheram erectam, et possint alongari et ascurtari cum ipsa Panthera cum verris positis in medio..... Et ista Panthera habeat circumquaque deforis ferramenta multa accuta et levia, longa brachia duo vel plus pro ferro, ut nullus possit appropinquari Pantheræ..... Et ex istis perticis sic ferratis, ponantur tres vel quatuor deforis circumquaque Pantheræ ; et si quis bene cogitaverit super isto artificio, multa et multa bona sequentur, quia cum modicis ex ipsis artificiis cum modica gente confunderetur magnus exercitus... Et ex hac eadem Panthera prudens et ingeniosus poterit circuire carrum et boves,....... et bellantes poterunt stare intra Pantheram super lecto carri ; et super ipso carro poterit fieri mangoneta, quæ trahet ubique lapides et rothecas.