Partionarii præterea nuncupantur ejusdem prædii seu feudi participes et domini, qui alibi pares et parerii vocantur, ut supra in voce Par observatum est. Charta ann. 1275. In Chartular. Angeriac. pag. 500 :

Me vendidisse et concessisse pure confiteor.... Abbati monasterii S. Johannis Angeriacensis totum illud jus et deverium, sive partem quam habebam et percipiebam cum aliis Partionariis meis in complanto vindemiæ feodi vulgariter appellati.

Homagia et fidelitates de Nobiliaco ex Cod. MS. ejusd. Monast. :

Giraudus de la Rocha facit homagium litgium Abbati et tres solidos de placito, et habet ab Abbate ipse et Partionarii sui domos, ortos, et alia apud Mairec.

Infra Campartionarii dicuntur. Partionaria animalia, quæ domini simul et coloni sunt, in Charta ann. 1107. apud Stephanot. tom. 4. Antiquit. Benedict. Pictav. MSS. pag. 632 :

Et pascua plenaria et libera ad omnia animalia prædictorum.... sive sint prædictis Fulcherio et successoribus suis propria animalia, sive medietariis suis Partionaria.

Vide Medietarius et Parcennarii.

Partionarii etiam appellabantur qui partem alicujus domus cum alio participabant. Stat. Bonon. ann. 1250-67. tom. II. pag. 79 :

De pluribus Partionariis habentibus domos in nostro episcopatu. - Item statuimus quod, si fuerint plures Partionarii in isto comitatu domorum vel casamentorum, teneantur Partionarii vendere ei, qui habet quinque partes justo pretio, et hoc dicimus habere locum in civitate vel suburbiis.

Fr.

Partionarius, Communis, nostris Mitoyen. Tabul. Nantoliense in Pictonibus ann. 1335 :

Quamdam pleiduram una cum chappali domus, quod chappale erit Partionarium inter me et dictam emptricem.

Partionarii. Statuta Ord. Præmonstrat. dist. 5. cap. 9 :

De Negotiatione vitanda, et Partionariis non habendis : Statuimus, ut quicunque nostri Ordinis Canonici vel conversi, convicti fuerint vel confessi, oves, vacas, seu quævis animalia Partionariis ad partem tradere, vel ad tempus locare, etc.