PYRALE, Hypocaustum conventuale, Estuve, in quo Capitulum celebrabatur : unde flagellum disciplinarum in eo appensum observat Eckehardus junior de Casibus S. Galli cap. 3 :

Rapto flagello fratrum, quod pendet in Pyrali, deforis accurre.

Cap. 10 :

Quidam ipsorum re agnita, rapto de Pyrali flagello, scelestum illum incurrens, clamitat, et nisi animis saniores ei erecto ad istum brachio occurrissent, grandes incussisset.

Cap. 11 :

Veniunt in Pyrale, et inde in lavatorium, nec non et proximum Pyrali scriptorium : et has tres regularissimas præ omnibus, quas unquam viderint, asserebant esse officinas.

Cap. 16 :

Ille ad columnam Pyralis ligatus acerrime virgis cæditur.

Vide Gynæceum et Pecten.