QUARENTENUM, Tributi species. Libertates Regni Majoricar. ann. 1248 :

Non donetis carnaticum de vestro bestiario ullo tempore, passaticum, herbaticum, neque Quarentenum.

Literæ Johannis Francorum Regis ann. 1363. tom. 3. Ordinat. pag. 626. num. 41 :

Item, quod durante tempore dictæ provisionis cessent omnia subsidia, focagia, capagia, Quarentena, indictiones, equi qui dicuntur de debito et alia onera.

Sed vereor, ne hic legendum sit capagia quarentena, sublata virgula, ut intelligantur capagia, seu pecuniaria subsidia, quæ in media Quadragesima solvi consueverant, ut dictum est supra in Capagium.