QUERELARE, Queri, Se plaindre. Ugutio : Querelari, querimoniari, lamentari. Querelosus, querula plenus. Papias : Querelatur, queritat, clamat, testatur. Vetus Interpres Alexandri Tralliani Iatrosophistæ lib. 2. passion. :

Et dicebat se mordicationem pati in ventre, et capitis dolorem se habere Querelabat.

Arnobius Junior in Psalmum 76 :

Memorans præterita bona, de malis præsentibus Querelatur.

Chronicon Farfense :

Quidam in terra Paulus.... Querelatus est Domino Karolo Regi... de Monasterio S. Angeli.... dicens, quod de suis parentibus fuisset, et sibi pertineret.

Italis Querelare, est accusare in judicio, dar querela, nomen deferre, diem dicere. Hac notione utitur Matth. Paris in Vitis Abbatum S. Albani pag. 67. et in Additamentis pag. 508. ubi :

Si videatur eis quod pertineat (negotium) ad forum regium, Querelatur judex ; qui confiteatur se post interdictionem processisse, amerciatur.

Placitum ann. 867. e Tabulario S. Tiberii :

Bonesindus Abbas... se Querelavit et dixit : Audite me Querelantem et proclamantem, etc.

Thomas Walsingus in Hypodigmate Neustriæ pag. 481 :

Eligantur hinc inde arbitri, qui si provideant, quomodo Querelantibus satisfiat, et Rex Franciæ se obliget.

Statuta criminalia Saonæ cap. 14 :

Si vero condemnatio fuerit minoris quantitatis dictarum librarum viginti.... non possit ab ea appellari, Querellari, nec nulla dici, seu aliqualiter Querellari ; sed omnino exequi debeat, nulla exceptione, seu defensione juris vel facti obstante.

Concilium Avenion. ann. 1209. tom. 2. Spicil. Acher. pag. 614 :

Tepidi sunt nimium et remissi ad justitiam coram se Querelantibus faciendam.

Charta ann. 1209. e Chartul. Meld. :

Querelabam contra G. Electum Meldensem essarta et nemus, et quicquid juris emerat, etc.

Literæ Philippi Franc. Regis ann. 1338. apud de Lauriere tom. 2. Ordinat. pag. 128. num. 34 :

Statuimus quod post dimissionem dicti officii in illo loco, debeant per 50. dies... continue residere, et Querelantibus de ipsis habeant respondere, ut possint ipsi Querelantes facilius consequi jus suum contra eos.

Hoc verbo usus est Servius in 1. Eclog. Virgilii :

Postea eum Querelantem invenimus.

Vide Querulari et Querulus.