RECURSUS 1, Glossarium mediae et infimae latinitatis, Du Cange et al.

« 1 recursus » (par les Bénédictins de St. Maur, 1733–1736), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 064b. http://ducange.enc.sorbonne.fr/RECURSUS1

1. RECURSUS, Justi monetæ ponderis accessio vel imminutio, Constitutionibus regiis permissa, qua fit ut nummi ejusdem speciei alii aliis sint magis minusve ponderosi. Ordinatio Humberti II. ann. 1340. tom. 2. Histor. Dalphin. pag. 416. col. 1 :

Fiant singuli grossi prædicti, ad Remedium ligæ unius grani magis vel minus, et ad Remedium ponderis, ut non possit brischiari, nec in billionum reduci, sed septenarum unius grossi, et scindatur absque forti et fragili in marcha, ad Recursum unius grani magis vel minus, a justo ad fortem vel ad fragilem.

Infra :

Qui oboli grossi scindantur absque forti et fragili, ad Recursum unius grani, sicut alia moneta supradicta.

Huc redeunt, quæ sequuntur col. 2 :

Possint esse in marcha quatuor fortes seu quatuor debiles, qui non recedant ab eorum pondere, nisi per unum, et in aliis supradictis monetis est descriptum.

Vide Henricum Poullain Tract. de Monetis pag. 427.

P. Carpentier, 1766.

◊ Ordinat. Caroli dalph. ann. 1357. in Reg. Cam. Comput. Paris. sig. Vienne fol. 18. r° :

Denarii taillientur ad Recours ad ballancetam, et possit esse de justo ad fortem unum granum et dimidium.

Alia ann. 1362. ibid. fol. 41. v° :

Ipsi denarii debeant taylliari ad balanzetam et ad Recors, et possit esse de justo ad fortem unus granus.

les Bénédictins de St. Maur, 1733–1736.

◊ Differt Recursus a Remedio, quod ille nummorum inter se compositorum majus minusve pondus spectet, hoc vero marcæ, unde certus nummorum numerus conficitur, materiam vel pondus attingat, ut infra dicetur in Remedium 3. Sed si vox Remedium de nummis inter se compositis dicatur, tum idem sonat quod Recursus, ut in Ordinatione ann. 1343. ibid. pag. 418 :

Et scindantur ad denariale et ad Remedium duorum granorum ponderis de justo ad fortem, et duorum granorum de debili ad justum.

Vide Henricum Poullain Tract. de Monetis pag. 204. et seqq. et mox Recurrere 3.

les Bénédictins de St. Maur, 1733–1736.

◊ Interdum Recursus, Gall. Recours, æquum est monetæ pondus : de quo sic D. Secousse tom. 3. Ordinat. Reg. pag. 94. nota e. Cum præcipitur, inquit, ut certus numerus nummorum ex una marca cudatur, non solum necesse est, ut hic numerus nummorum unam marcam pendat, sed etiam requiritur, ut singuli nummi æqualis sint ponderis : quod dicitur Recursus nummi ad marcam vel marcæ ad nummum. Si autem admodum acceleranda est monetæ cusio, hanc æqualitatem, seu proportionem, servare non jubentur cusores, tumque moneta dicitur sine Recursu, ut in Literis Caroli Johannis Regis Franc. primogeniti ann. 1356. editis pagina laudata :

Et fait commandement, et enjoindre expressement par aucuns de nostre Conseil, aux gardes et maistres de la monnoye d'argent de Paris, que il feissent tailler et ouvrer à bade sans Recours, afin que pour la cause dessusdite, peust et deust estre fait le plus grand ouvraige que l'en pourroit, duquel ouvraige ainsi fait à bade et sans Recours, a bien esté fait six mille trois cens douze livres dix solz de gros deniers blancs.

Quo in loco pro à bade, ubi hæret et mendum suspicatur oculatus Editor, legendum esse puto à hade, vel potius à hâte, propere, festinanter : quod nunc dicimus à la hâte, vel en hâte. Quam belle loco citato cohæreat hæc emendatio, nihil opus est dicere.