2. REGARDUM, Rewardum Forestæ, Visitatio forestæ ab forestariis, ne quid detrimenti in iis accidat, ut in Fleta lib. 2. cap. 41. § 1. interdum limites vel ambitus forestæ, cujus cura commissa erat quibusdam ministris, qui eam obambularent, prospicerentque ne vetitæ in ea venationes fierent, aut exscinderentur arbores, qui inde regardatores dicuntur, de quibus mox : unde qui intra ejusmodi metas venari, vel damnum aliquod in foresta fecisse deprehensus erat, mulctabatur gravi mulcta, quæ Regardum forestæ etiam dicebatur. Charta Ricardi I. Regis Angliæ :

Concessimus etiam eisdem manerium de Lovers cum omnibus pertinentiis,... salvis ad opus nostrum venatione nostra, et destructione forestæ, ita tamen quod non sit in Rewardo.

Revardo, apud D. Brussel tom. 2. de Feudorum usu pag. xix. Rogerus Hovedenus et Brompton. ann. 1188 :

Et idem Rex quietas clamavit... omnes terras suas et Canonicorum suorum, quod sint liberæ et quietæ in perpetuum de Rewardo forestæ et forestariorum : et dedit ei per cartam suam liberam potestatem et licentiam capiendi venationem per omnes præbendas suas in Comitatibus Eboraci et Notynghamiæ.

Leges Forestarum Scoticarum cap. 12. § 1 :

Si quis forestarius invenerit aliquem extra dominicum boscum, vel infra Rewardum, prosternentem quercum sine visu vel deliberatione forestarii.

Vetus Inquesta in Regesto Phil. Aug. Herouvalliano fol. 119 :

Inquisitores dicunt, quod Bonavilla cum pertinentiis valebat sine placito ensis et Regardis forestæ et pasnagii, etc.

Fol. 158.

Respectus forestæ

dicitur. Vide Nomolexicon Thomæ Blount in voce Regard.