REPORTAGIUM 1, Glossarium mediae et infimae latinitatis, Du Cange et al.

« 1 reportagium » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 132a. http://ducange.enc.sorbonne.fr/REPORTAGIUM1

1. REPORTAGIUM, Medietas decimæ ; Reportage. Charta Theodorici Episc. Ambian. ann. 1150

Mater Ecclesia Ambianensis ex antiquo dignitatis suæ privilegio obtinet medietatem decimæ, quæ vulgo dicitur Reportagium

. Alia ejusdem anni 1172 :

Cum prædicti Monasterii fratres apud Flaisserolles commorantes Reportagium, medietatem videlicet decimæ, quam Ambianensis Ecclesia de labore parochianorum suorum in territoriis Polivillæ et Choisi agricolantium de antiquo obtinuerat, retinere attentassent.

Charta ann. 1245. ex Tabulario S. Germani Pratensis :

Illa cujus esset major decima de Clamardo ratione prædictæ consuetudinis sequens colonum suum haberet nomine Reportagii medietatem decimæ terræ illius sic cultæ, etc.

Charta G. Abbatis S. Florentii Salmuriensis ann. 1246. ex Tabulario S. Dionysii :

Ratione cujusdam consuetudinis, quæ Reportagium sive Carrutagium vulgariter nuncupatur.

Ita in alia Decani Paris. ejusd. anni Carturagium habetur ; et melius, ni fallor, Carrucagium, in alia mox laudanda e M. Pastorali Eccles. Paris. Alia anni 1166. in Tabulario Abbatiæ S. Acheoli Diœcesis Amb. fol. 455 :

Clamabamus siquidem inter nos invicem quasdam decimas per consuetudinem Reportagii.

Et infra :

Totam nihilominus decimam absque Reportagio possidebit.

In eadem Charta :

Nihil habebit Reportagii ; sed tota ex integro decima ad jus et possessionem de Marcel deferetur, sicque manifestum et patens, quod neque Ecclesia de Marcel de curte de Bertencourt et culturis suis antiquis, neque Corbeiensis Ecclesia de omni territorio, quod ad jus et parochiam de Marcel pertinet, aliquid omnino reportabit.

Charta ann. 1246. in M. Pastorali Eccl. Paris. lib. 23. ch. 95 :

In locis illis duntaxat, quos coloni decimariæ sive territorii nostri in eorum decimaria excolebant ratione cujusdam consuetudinis, quæ Reportagium sive Carrucagium vulgariter nuncupatur.

Tabularium Altæripæ in Episcopatu Lingonensi ann. 1287 :

Dictus Curatus illam decimam, quæ debetur nomine Reportagii, accipiet et habebit.

Occurrit non semel in Tabulario S. Dionysii fol. 15. 16. 32. et in Tabulario S. Germani de Pratis fol. 103. ut et in Tabulariis Compendiensi, et S. Medardi Suessionensis, etc.

les Bénédictins de St. Maur, 1733–1736.

◊ Locum habebat Reportagium, cum ab hominibus seu colonis unius Ecclesiæ agri excolebantur in vicino alterius Ecclesiæ seu parœciæ territorio ; tunc enim medietatem decimæ frugum ex iis agris nascentium percipere solebat prior Ecclesia, etiamsi nullum aliunde jus, nullam aliam in ea parœcia decimam habere consuevisset ; hinc inter Ecclesias de Reportagiis dissidia. Hujus rei testis est Charta E. Prioris S. Martini de Campis ann. 1243. in Tabulario nostro Sangermanensi :

Notum facimus, quod cum talis esset consuetudo inter villas de Meudonno et de Clamardo, quod si aliqua terra arabilis coleretur in territorio et parrochia de Meudonno per colonos et animalia commorantia in parochia de Clamardo, ille cujus esset major decima de Clamardo ratione prædictæ consuetudinis, sequens colonum suum, haberet nomine Reportagii medietatem decimæ terræ illius sic cultæ, et eadem consuetudine similiter uteretur villa de Meudonno in territorio et parochia de Clamardo. Tandem inter nos ad quos spectat major decima de Clamardo et religiosos viros Abbatem et Conventum S. Germani de Pratis Paris. ad quos spectat major decima de Meudonno, fuit concorditer ordinatum, ita videlicet quod nos... supradictam consuetudinem remisimus... et quidquid nomine Reportagii in territorio de Meudonno percipiebamus... præfatus vero Abbas et Conventus S. Germani præfatæ villæ de Clamardo eandem consuetudinem remiserunt.

P. Carpentier, 1766.

◊ Charta ann. 1499. in magn. Chartul. nig. Corb. fol. 75. v° :

Quotiescumque coloni.... de Villers le Bretonneulx coluerant aut colebant agros territoriorum de Folliaco et Albigniaco, jus quoddam, quod Reportagium dicebamus, pertinere (asserentes) ex segetibus, messibus et sementis crescentibus in dictis territoriis de Albigniaco et Folliaco ; quod quidem Reportagium dicebamus alienum diversumque a jure decimæ.

Vide Raportus 2. et Reportus 3.

« 2 reportagium » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 132b. http://ducange.enc.sorbonne.fr/REPORTAGIUM2

2. REPORTAGIUM, Dictum, sententia, arbitrium, Gallice Rapport. Charta Libertatum Villæ Maceriarum ann. 1233 :

Si aliquis casus emerserit, qui in ista Charta, et per istam Chartam determinari non valeat, idem casus ad usagium patriæ per Reportagium Scabinorum firmiter tenebitur.