2. REPUTATIO, Lamentatio mulierum, quæ suis cantibus luctuosis in funeribus omnes ad lamentandum excitabant, hinc Reputatrices et Reputantes, dictæ, quod defunctorum gesta reputarent seu enarrarent : de quibus jam supra dictum est, in voce Cantatrices. Constitutiones Frederici Regis Siciliæ cap. 101 :

Quoniam Ruputationes (Reputationes) cantus et soni, qui propter defunctos celebrantur, animos astantium convertunt in luctum, et movent eos quodammodo ad injuriam Creatoris, prohibemus Reputantes funeribus adesse, vel aliæ mulieres, quæ earum utuntur ministerio, nec in domibus seu Ecclesiis, vel sepulturis, vel alio quocumque loco, nec pulsentur circa funebria guidernæ vel guiternæ, vel timpana, vel alia solita instrumenta, quæ ars magis ad gaudium, quam ad tristitiam adinvenit, pœna unciarum auri quatuor mulctandis iis, qui eas admiserint circa hoc, et ipsis Reputatricibus similiter : quæ Reputatrices, si pœnam solvere propter paupertatem non possint, ne pœnalis prohibitio eludatur, fustibus cædantur per civitatem et terram, ubi prohibita tentaverunt.