RETORNUM, vel Retornus, Pignus, hypotheca. Donatio ann. 1125. in Probat. novæ Hist. Occitan. tom. 2. col. 430 :

Si vero ipsæ pignoræ, quas mihi donatas habetis, fuerint de me redemptæ, donem ipsum avere propter ipsum honorem bene tantumdem valentem ad vestram recognitionem : quod si non fecero, habeatis Retornum in toto ipso meo honore, qui mihi accidit ex parte patris mei et matris meæ.

Tractatus pacis ann. 1162. ibidem col. 584 :

Si vero forte contra has conventiones et fines venerimus...... damus tibi et tuis Retornum pro pignore in toto quod habemus in castello de Piniano et ejus terminio ; ita quod auctoritate tua, sine contradictione nostra nostrorumque, liceat tibi et tuis accipere, tenere et possidere, sine inquietudine nostra nostrorumque, et tamdiu teneas et possideas tu vel tui, et redditus tuos facias, ita quod in sortem non computentur, donec totum damnum in duplum, et injuria cabalment sit restitutum et restauratum.

Infra :

Adhuc promittimus et convenimus tibi et tuis, quod si prædictam transactionem et finem post primam vicem fregerint, ulterius Retornum in castella vel villas vel terras nostras, in quantum poterimus, ipsi vel coadjutores eorum non habebunt.

Charta ann. 1209. ex Archivo Domus S. Johannis Jerosol. Arelatensis :

Ego Hugo de Baucio tibi Barralæ uxori meæ pro dictis 8055. solidis pro dicta venditione quam fecisti, et quos habui, do tibi in Retornum et in potecham (hipothecam) totum meum pertenementum, quod habeo.

Charta ann. circiter 1143. inter Instrum. Gall. Christ. tom. 6. col. 192 :

Quod si infantes facere noluerint, dono eis Retornum in vinea, quam habeo subtus viam de Mareisanegues.