ROSTRARE, Quasi rostro quærere. Glossæ Lat. Græc. : Rostrat, ἐπιζητεῖ. Vulcanius corrigit Rastrat ; sed nihil mutandum esse contendit Martinius, cui ἐπιζητεῖ, idem est quod Appetere, et Rostrare, idem quod Rostro captare et appetere, vel quærere. Hanc opinionem firmant Glossæ Græc. Lat. ubi : Ἐπιζητεῖ, Rostrat, desiderat, requirit. Vox ducta est ab avibus, ut videtur, ac fortassis etiam a porcis, qui rostro quærunt escam. Apud Plinium lib. 18. cap. 19. legitur :

In collibus transverso tantum monte aratur, sed modo in inferiora, modo in superiora Rostrante vomere,

alias Reptante. Budæus Rostrante exponit Rostrum impingente : cui Harduinus addit : Vel rostrato forte vomere dixit, hoc est, simplici, non aurito, quo utuntur in planis, auctore Palladio 1. cap. extremo.