SALVITAS, Immunitas data loco vel Ecclesiæ aut Monasterio a Principibus. Tabularium Monasterii de Regula fol. 39 :

Sint igitur isti Monachi in subjectione Regis, ad locum Salvum faciendum, non etiam ad aliquod persolvendum.

Quæ quidem salvitas suis limitibusconstabat, ut multis docuit Marca lib. 5. Histor. Beneharn. cap. 13. n. 3. ut et Catellus in Hist. Tolosana pag. 194. Ἡ τῶν ὅρων ἀσφάλεια, in Nov. 17. Justiniani cap. 7. Vide Dextri. Charta ann. 1132. apud eumdem Catellum lib. 5. Rerum Occitanarum pag. 786 :

Qui præsentes erant Episcopi locum ad eandem Salvitatem circumeundo designaverunt, et ejus continentiam crucibus infixis terminaverunt. Quæcunque igitur persona, quicquid infra easdem cruces continetur, invaserit, prædatus fuerit, aut vexationibus fatigaverit, vel ad hoc consilium seu auxilium subministraverit, ita ut vel incolam vel peregrinum, sive omnino aliquem in præfata Salvitate læserit, aut quicquam abstraxerit, ex autoritate P. C. T. SS. anathematizati erunt, etc.

Charta Guillelmi Ducis Aquitaniæ ann. 1027 :

Concedo ad Basilicam S. Crucis Burdegalæ Salvitatem illius loci, et allodium liberum, et villam S. Macarii, ubi ipse B. Macarius..... requiescit.

Tabularium S. Petri Generensis :

Gasto Vicecomes Beharnensis juravit Salvitatem in Castello cum omnibus sui Vicecomitatus optimatibus.

Idem Vicecomes in Tabulario Palensi :

Juravit libertatem et Salvitatem ipsius Ecclesiæ, et securitatem omnium hominum, et rerum cunctarum, quæ ad Monachos pertinent.

Charta ann. 1150. apud Catellum in Comitibus Tolosanis pag. 218 :

Qui scienter occidit hominem injuria, non defendat eum Ecclesia, neque claustrum, neque Salvitas.

Charta Alexandri III. PP. ann. 1167. in Append. ad Marcam. Hisp. col. 1347 :

Insuper etiam omnes Salvitates, quæ a multis retro temporibus in villa quæ conjuncta est monasterio vestro et in terminis ejus rationabiliter constitutæ sunt, præcipimus perpetuo inviolabiliter observari....... prohibentes ne quis Salvitates et securitates ipsas, quæ pro communi utilitate monasterii et hominum constitutæ sunt, ausu temeritatis infringat.

Edictum Nunonis Sancii D. Rossilionis de Treuga tenenda ann. 1217 :

Item emunitates et Salvitates Templi et Hospitalis Hierosol. sub eadem pace constituimus. Statuimus tamen quod de cætero domus Templi et Hospitalis vel alius venerabilis locus religiosus non recipiat novas Salvitates sine consilio D. Episcopi et Vicarii nostri.

Concilium Rolfiacense ann. 1258. cap. 2 :

Infringunt Ecclesias, et violant Salvitates, etc.

Charta Hugonis Bruni, Comitis Marchiæ pro libertatibus Bellaci, in Regesto Inculismensi Cameræ Comput. Paris. pag. 36 :

Cum concordassent inter se, et etiam juramento firmassent consuetudines et Securitates castri et villæ de Belac se fideliter observaturos, et metas etiam et terminos posuissent, infra quos omnes homines, Milites, clientes, burgenses, rustici securitatem haberent,... eodem modo consuetudines et Securitates et metas et terminos eosdem, infra quos nullus, qui jus facere velit et possit, capiatur. Metæ videlicet et termini sunt isti. V.

Bannus sacer pag. 552. col. 1. et Salvatio 2.