SARACENI, Glossarium mediae et infimae latinitatis, Du Cange et al.

SARACENI, Populi notissimi, qui a Sara Abrahami uxore legitima id nominis sibi assumpserunt. Hieronymus in Ezech. lib. 8. cap. 25 :

Agareni, qui nunc Saraceni appellantur, falso sibi assumpsere nomen Saræ, ut de ingenua et domina videantur generati.

Adde lib. 5. in Isa. cap. 21. et Agobardum de Insolentia Judæor. cap. 21. Nicolaus de Lyra in Isaiæ cap. 20 :

Arabes sunt Saraceni ab Ismaele et Cadar filio ejus, qui melius a matre sua Agareni. Sed maluerunt vocari Saraceni, quasi Saræ liberæ, non Agar ancillæ sint filii.

Vide Arnobium in Psalm. 119. A Saraca regione Saracenos dictos vult Stephanus. Alii a Σαράχ Arabico quod est ληστής, unde Σαραϰηνοί, quasi ληστριϰοί. Alii a voce Hebraica Sarak, quæ vacuum et inane sonat, ita ut Saraceni dicti fuerint quasi viri inanes, minimeque frugi homines, aut vitam pauperem, duram et incultam agentes, qualis eorum plerumque est qui rapto vivere solent, locaque deserta et horrida incolunt. Vide Innocentium Cironum in lib. 5. Decretal. tit. 6. et Nicol. Fullerum lib. 2. Miscell. sacr. cap. 12. Saracenorum vocabulo Ungaros etiam, atque adeo gentes paganas promiscue donant interdum Scriptores, ut Hepidannus, Eckehardus junior de Casibus S. Galli cap. 15. etc.

Saraceni, in Hispania, Regis olim vel Dominorum erant, ut Judæi, apud nostros, proinde etiam in commercio. Michael del Molino in Repertorio pag. 303. cap. 1 :

Saracenorum corpora sunt Dom. Regis. Etiamsi Saracenus de loco Do. Regis transeat ad locum infantionis ; nisi infantio duxisset eum de partibus alienis, etc.

Infra :

Saraceni habitantes in villa alicujus Varonis, vel infantionis, si decedunt sine filiis, potest Dominus loci occupare omnia bona sua.

Rursum :

Saraceni habitantes in locis Dom. Regis omnes sunt in commanda et guarda speciali Dom. Regis, nec possunt dicti Saraceni se ponere in commandam alicujus nobilis aut alterius, etc.

Testam. Arnaldi Narbon. Archiep. ann. 1149. inter Instr.

tom. 6. Gall. Christ. col. 39 :

Laxo episcopo Biterrensi omnes Sarracenos meos.

Charta alterius Arnaldi itidem Archiepisc. Narbon. ann. 1225. ibid. col. 58 :

Donamus.... monasterio Fontis-frigidi...... duas carretas nostras et equos earum, ut et Sarracenum carraterium nostrum.

P. Carpentier, 1766.

◊ Nostri Sarrazins etiam appellarunt errones quosvis, qui rapto vivere solent. Lit. remiss. ann. 1453. in Reg. 184. Chartoph. reg. ch. 376 :

Pluseurs Egiptiens, wlgaument nommez Sarrazins,... arriverent à l'entrée de la ville de Cheppe en entention de y estre logiez, entre lesquelz en y avoient aucuns, qui portoient javelines, dars et autres habillemens de guerre ;.... en tout jusques au nombre de 60. ou 80. personnes.

Aliæ ann. 1467. in Reg. 200. ch. 28 :

Pour ce qu'il y avoit des Sarrazins ou Bohemiens ou pays, etc.

Hinc Jeu Sarrazionois, pro Acris pugna, more Saracenorum, Gall. Combat sanglant, in Poem. Alex. MS. part. 1 :

Tholomer le regrete et le plaint en Grijois,

Et dist que s'il eussent o eulz telz vingt et trois,

Il nous eussent fet un jeu Sarrazionois.

Saracenus, Moneta Saracenorum. Jacobus de Vitriaco lib. 3. pag. 1125 :

Cui unusquisque fratrum singulis annis pro certo reditu dignitatis suæ transmittit mille Saracenos, et duos dextrarios bene præparatos.

Infra :

Et quilibet omni anno pro certo tributo solvit ei 20. mille Saracenos in fisco patris, et pater dat omni anno unicuique filiorum tantum auri, unde possit fieri unus annulus, in quo sculpitur imago ipsius.

Cencius in Ord. Rom. apud Mabill. tom. 2. Musei Ital. pag. 200 :

Hoc est presbyterium quod datur officialibus camerarii.... Sartori cameræ duo Saraceni, custodi cameræ duo Saraceni, etc.

Adde Matth. Paris. ann. 1193. pag. 122. 123.

Saracenatus, Sarracenatus, Simili notione, eidem Jacobo de Vitriaco pag. 1126 :

Et valet illud frequenter 20. mille Saracenatos.

Mox :

Et plus valent isti redditus quam 40. mille Saracenati.

Chron. Richardi de S. Germano apud Murator. tom. 7. col. 987 :

Quolibet anno pro certo tributo mittit in fisco patris 20. millia Saracenatos.

Charta ann. 1243. ex Tabul. Commun. Massil :

Dimidius Saracenati Acconis computatur pro libra.

Vide Byzantii saracenati.

les Bénédictins de St. Maur, 1733–1736.

Saracenallus, Eodem significatu. Charta ann. 1163. ex Tabul. Massil. :

Recepimus de mutuo communi Massiliæ 1211. bizantios Saracenallos.

Saracenia,

Multitudo et societas Saracenorum, vel ritus eorum, vel regio eorum.

Ugutio.

P. Carpentier, 1766.

Sarracenia, Saracenorum regio, nostris Sarrasinesme et Sarrazinorsin. Annal. Victor. MSS. ad ann. 1270 :

Cumque tanta multitudo merito debuisset putari posse non solum Terram sanctam, sed et totam Sarraceniam subjugare, etc.

Hist. Caroli VI. pag. 199 :

Le mareschal Boucicaut fut en Sarrasinesme faire guerre aux Sarrasins.

Lit. remiss. ann. 1393. in Reg. 145. Chartoph. reg. ch. 479 :

Un surnommé Ragam, fils naturel d'un poure laboureur, qui savoit bien que dès long temps avoit et en son jeune aage, feu Patry de Chaources chevaliers, lors seigneur de Rabastan, avoit esté pris et emmené prisonnier par les Sarrazins, se vanta et se nomma seigneur de Rabastan,.... en donnant à entendre qu'il venoit de Sarrazinorsin.

Vide in Saraceni.

les Bénédictins de St. Maur, 1733–1736.

Saracenismus, Gens, terra Saracenorum. Memoriale Potestat. Regiens. ad ann. 1270. apud Murator. tom. 8. col.

1131 :

Et sperarent, quod non solum Terram sanctam, sed etiam totum Saracenismum subjugari debuissent.