Sarsorium, Opus ex variis quodammodo materiis contextum et confectum, cujusmodi sunt ut plurimum Sartorum opera. A sarcio enim dicitur Sarsum et sartum, uti observat Turnebus lib. 24. Adversar. cap. 22. unde Sarsura, apud Varronem. Aliter tamen Caper de verbis dubiis :

Sartum, non sarsum.

S. Cæsarius Arelat. in Regula ad Virgin. cap. 42 :

Nihil aliud in ipsis (Monasteriis) nisi cruces aut nigræ, aut lactinæ tantum opere Sarsorio de pannis, aut linteis apponantur.

Gregorius Turon. lib. 2. Hist. cap. 16 :

Parietes ad altarium opere Sarsurio ex multo marmorum genere exornatos habet.

Epigramma 91. Ennodii inscribitur

de marmoribus opere Sarsorio

, ex quo etiam colligitur ita appellari varias discolorum marmorum crustas invicem commissas, ut unum corpus et unam quasi picturam efficiant, uti describitur a Senatore lib. 1. Epist. 6. Idem proinde quod Musivum opus alibi dicitur. Vide in hac voce.