SCOTERIA, Scoterii. Clerici de Scoteria, qui fuerint facile colligitur ex Statutis MSS. Capituli Audomar. :

Statuimus quod receptor bursæ anniversariorum juxta posse satisfaciet plenarie et sine diminutione canonicis, vicariis, capellanis et clericis de Scoteria ac aliis de obitibus et anniversariis per eosdem lucratis.... Statuimus et ordinamus quod præpositus, decanus, cantor, canonici, capellani, vicarii, clerici domus Scoteriæ et alii habitum ecclesiæ deferentes, etc. Volumus autem quod prædicti capellani percipientes distributiones in choro tam Scoterii quam vicarii habeant celebrare Missas suas, etc. Circa clericos autem de Scoteria statuimus.... quod nullus eorum extra domum prædictam pernoctare præsumat, quodque nullus ad eamdem post pulsum campanæ dictæ Varde cloque per receptorem domus admittatur... Item deservient dicti clerici de Scoteria hoc modo, videlicet quod a festo sancto Paschæ usque ad festum O. SS. recipiet quilibet eorum iv. marellos pro die interessendo divinis ..... a festo O. SS. usque ad festum Paschæ.... v. marellos... de quibus iv. marellis pro prandio solvet ii. marellos, et i. pro cœna receptori domus ; alioquin a comestione prandii et cœnæ privabitur. In fine cujuslibet hebdomadæ omnes suos marellos quos habuerint residuos....... receptori domus reddere teneantur, etc.

Vocis originem haud dubie habes in voce Scot. Hic enim ad victum quotidianum de acceptis marellis symbolas receptori dare tenebantur. Usum vocis hujus apud Audomarenses probat Charta Guillelmi Comitis Flandriæ supra in Scot laudata.