1. SCURIA, Idem quod Scura, Stabulum equorum, unde vocem Escurie hausimus. Lex Salica tit. 18. § 3 :

Si quis sudem cum porcis, Scuriam cum animalibus, vel fenile incendit, etc.

Ubi Wendelinus scuriam ait hoc loco sumi generatim pro horreo amplo condendis frugum manipulis, intra quod per hiemem grana flagellis extunduntur, intra quod boum stabula erant, quod etiam in Texandria usurpari passim constat ; unde Teutones Schuere eadem notione dicunt, ut Schuer, et Schuerenære, pro area, in qua excutiuntur manipuli : proprie Scuria, ut observat Eccardus in notis ad Pactum Leg. Salicæ pag. 44. est locus tectus. Schur enim Saxonibus adhuc audit quivis locus, ubi aliquid ab injuria aeris defendi et tegi potest. Lex Alamannor. tit. 81. § 2 :

Si enim domum infra curtem incenderit, aut Scuriam, aut graneam, vel cellaria, etc.

§ 5.

Scuriam vel graneam servi si incenderit, etc.

Adde tit. 97. § 4. Lex Bajwar. tit. 2. cap. 4. § 5 :

Quando aliqui defendere volunt casas vel Scurias, ubi fœnum vel granum inveniunt.

Adde tit. 9. cap. 2. § 2. Edictum Pistense Caroli Calvi cap. 29 :

Et de manopera in Scuria battere nolunt.

Hincmarus Remensis in Opusculo 50. Capitulorum cap. 1 :

Insuper et Scuriam ipsius Presbyteri interclusit, et annonam de terris dominicatis collectam, sine licentia ipsius Presbyteri in ea misit, omnemque potestatem inde Presbytero abstulit.

Tabularium S. Remigii Remensis :

De Scuria facit plenam perticam et omni tempore ipsam mensuram restaurat. In Adenaio est mansus dominicatus cum ædificiis et torculari, curte, et Scuriis, et horto. Sunt ibi aspicientes inter majores et minores campi 46. continentes map. 110. ubi possunt seminari de frumento modii 34. de sigillo modii 30. etc.

Infra :

In Muriniaco habet sessum 1. cum ædificiis, curte et Scuriis. Solent ibi esse boves domini, quia ibi prope sunt terras supra scriptas.

Occurrit ibi aliquoties. Tabul. S. Bertini :

In Beringahem habet mansum cum Scuria.

Vide Scura. Graff. Thes. Ling. Franc. tom. 6. col. 536.