SPALLA, Idem quod Spadula, Italis Spalla, Gallis Espaule, Armus. In plerisque veterum Chartarum sumitur pro armo, aut membro ferarum, vel aprorum, aut cervorum, quod præstari domino solet, pro jure vel facultate venandi in silvis dominicis. Tabularium Prioratus de Domina in Delphinatu fol. 64 :

Mansus de Malburc 13. lib. de porco, de ubliis 6. denar. et 5. Spallas, et 11. den. etc. Spalla porcina,

in Bulla Honorii III. PP. apud Ughellum tom. 1. part. 1. pag. 823. Charta alia ann. 1195. apud eumdem tom. 7. pag. 1321 :

In Nativitate Domini duas Spallas porcorum.

Innocentius III. PP. lib. 13. Ep. 65 :

Qui venabantur in ipsa (silva) reddebant eidem singulis annis Spallam porci.

Idem cap. Cum venerabilis de Censibus :

Præfatus Episcopus Spallas, quas ab eadem Ecclesia, tam ipse, quam prædecessores sui recipere consueverant, Ecclesiæ præfatæ remisit, et statuit, quod aliud ei servitium non imponeret.

Charta Alexandri III. PP. ann. 1174. apud Ughellum tom. 1. part. 1. pag. 512 :

Quod Giso Primicerius Ecclesiæ vestræ in obitu suo reliquit, videlicet Spallam cum lonza, et sarcinam musti, etc.

Duas Spallas de porco, in Charta ann. 1064. ex Tabular. S. Victoris Massil. Adde Chron. Farf. apud Murator. tom. 2. part. 2. col. 563. Chron. Tarvis. tom. 9. col. 777. Statuta Vercell. lib. 3. fol. 107. v°. Statuta Riperiæ cap. 16. fol. 9. v°. etc. Humerus porci, in vett. Statutis Canonicorum S. Quintini in Viromanduis. Charta Amalrici Comitis Ebroicensis in Tabulario S. Maglorii Paris. :

De cervorum insuper et cervarum omnium venatione, dextros armos.

Horatius sat. 4 :

Fœcundi leporis sapiens sectabitur armos.