SUPPEDANEUM. Joan. de Janua :

Scamnum quod altioribus lectulis apponitur, seu scabellum, quod parvulis lectulis apponitur. Idem dicitur Suppedaneus, et hypodeon a Græcis.

Legendum hypopodion. Gl. Lat. Gall. Sangerm. : Suppedaneum, vel hic Suppedaneus, Banc à mettre soubz les piez. Jul. Firmicus de Error. profan. Relig. :

Quoad usque ponam inimicos tuos Suppedaneum pedum tuorum.

Ubi Psal. 109. 2. respicit. S. Augustinus in Psal. 98 :

Suppedaneum dicitur Scabellum : quod dicunt Græci ὑποπόδιον, Latini Scabellum, et alii dixerunt Suppedaneum. Scabellum Suppedaneum,

Gregorio M. lib. 1. Dialog. cap. 2. et Paulo Diacono lib. 2. de Gest. Longob. cap. 28. Liberatus Diacon. cap. 12 :

Surgens Dioscorus, et stans in Suppedaneo sedis suæ, dicebat Consilio, etc.

Vita S. Adalberti Episcopi Pragensis apud Surium :

Suppedaneum reddas, quisquis es, qui tanta audes.

Supra Scabellum dixit. Liber Ordinis S. Victoris Parisiensis MS. cap. 37 :

Lecti de dormitorio ita sint demissi, ut nullus unquam ante lectum Suppedaneum habeat.

Statuta Ordinis de Sempringham :

In dormitorio non sedeant, exceptis intervallis,.... et quando se calciant et discalciant, vel quando mutant tunicas : et tunc in lectis suis vel in subpedaneis, exuentes et induentes se, honeste et caute faciant, ne nudi appareant.

Helgaudus in Roberto Rege Franc. :

Inter colloquium unumquemque aspiciens, vidit quendam eorum mole carnis gravatum, pedes suos dependere ab alto. Pietate ductus, a longe quærens Suppedaneum reperit unum,..... et sub pedibus ejus ponere non est dedignatus.

Hugo Flaviniac. pag. 163 :

Surgens namque a latere Principis, et Suppedaneum suum ipse ferens, Abbatem suum petiit, et posito ad pedes ejus Suppedaneo, in eo ipse resedit, etc.

Vide Meursium in Σουππέδιον.