TERRARIA, Terrarium, Ager, prædium, possessio, territorium. Charta Guillelmi Episc. Cabilon. ann. 1297. inter Instrum. Gall. Christ. novæ edit. tom. 4. col. 252 :

Episcopi Cabilonenses consueverunt ab antiquo conferre in Terrariis Decani et Capituli præfatæ Ecclesiæ Cabil... quædam officia seu potestates quasdam, quæ vulgariter Vicedominatus nuncupantur, Canonicis videlicet Ecclesiæ Cabilonensis.

Et post pauca :

Dictos vicedominatus seu redditus eorum vendebant laicis et personis extraneis, propter quæ aliquoties homines Capituli gravabantur ab ipsis hominibus, levando emendas minus juste, extorquentibus etiam ab hominibus Ecclesiæ Cabil. qui in dictis Terrariis commorabantur, patrimonia eorumdem, et eosdem prægravantibus vexationibus infinitis.

Ibid. col. 253 :

Terrarii dictorum locorum in Terrariis et locis prædictis poterunt ponere auctoritate propria, ipsis Canonicis prædictis prædictos redditus percipientibus minime requisitis, unum de Terrariis, vel unum alium fidelem virum, qui dictas terras et justitias vicedominatuum prædictorum fideliter teneat et gubernet, etc.

Rursus infra :

In refusionibus et pecuniis, quas debent pro suis Terrariis et præbendis.

Charta Roberti Episc. ejusd. Eccles. ann. 1307. de eadem re ibid. col. 256 :

Terrarii (non tenentur) dictam medietatem dictarum pensionum nobis solvere vel tradere vel in partagio dictarum Terrariarum dictæ Ecclesiæ, quando casus occurreret, nobis aut successoribus nostris aliquid assignare, etc.

Charta ann. 1239. e Chartulario S. Vandregesili tom. 2. pag. 1636 :

In villa autem Alpici vel omni Terrario, si sanguis effusus fuerit, vel facta seditio, vel vagium belli datum, meum est judicare.

Vide Terragium 2.