THORACIUM, Carchesium proprie, Gall. Hune ; item Specula, inspectorium, contracte a voce integra Theoracium, inquit Carolus de Aquino, quod a cernendo vel inspiciendo, ex Græco θεωρεῖν, dicitur. Non solum est summitas, seu loculamentum in suprema parte navis, in quo degunt Speculatores ad remotissima quæque lustranda et exploranda ; verum etiam machinula bellica, utilis et accommodata ad explorandum impune statum rerum hostilium in urbium aggressionibus. Appendi vero hujus generis machinulæ vel defigi solebant in scalis, quæ inde speculatoriæ appellabantur, in machinis arietariis aliisque organorum generibus, quæ vi potissimum tollenonis in sublime sustollebantur. Thoracii, pro inspectorio vel specula, meminit Hero de Machinis bellicis, ubi videndus est Bocacius. Hæc e Lexico militari.