◊ Trabeationem minus recte Cangius nosque ipsi in voce Annus pag. 269. ejus auctoritate ducti, Crucifixionem seu Passionem Christi sumus interpretati : nam Incarnatio seu Nativitas hac voce significatur ; quod aperte demonstrari potest Chartis bene multis. Decretum Electionis Borelli Episcopi Rotensis apud Baluzium tom. 2. Capitul. col. 630. datum dicitur anno Trabeationis D. N. J. C. mvii. æra mlv. Indictione xv. Concurrente i. Epacta xx. Notum est æram Hispanicam epocha Nativitatis Christi antiquiorem esse annos 38. Totidem annis æra Decreti laudati superat annum trabeationis. Præterea cæteræ omnes notæ chronologicæ anno Nativitatis conveniunt, non Passionis, ut et annus xxi. regnante Roberto Rege sub finem hujus Decreti notatus. Idem probant Charta 145. Appendicis Capitul. quam laudat ipse Cangius, alia ann. 947. Marcæ Hispan. col. 860. alia ann. 957. ibid. col. 874. alia ann. 972. ibid. col. 900. alia ann. 986. apud Marten. tom. 1. Ampliss. Collect. col. 336. alia ann. 1013. in Probat. novæ Hist. Occitan. tom. 2. col. 168. alia ann. 1035. tom. 6. Spicil. Acher. pag. 435. in quibus omnibus adjunctæ sunt aliæ temporis notæ Nativitatem constanter indicantes, non Crucifixionem. Trabeatio autem, non a trabe, qua Crux intelligi posset, sed a trabea, togæ species, deducitur, atque ex hoc, nisi me fallo, S. Fulgentii Sermone de S. Stephano, ubi ait :

Heri enim Rex noster Trabea carnis indutus,

id est, Incarnatus, seu natus ; ex quo loco Trabeationem, pro Incarnatione, seu Nativitate Notarios finxisse probabilissimum est. Vide Trabea 2.