Tyrones in Palatio appellat auctor Vitæ S. Pelagii Nobiles aulicos, qui Principis ministerio inserviebant, qui

Militares Regis pueri, et regalibus annonis nutriti

dicuntur S. Eulogio in Memor. SS. lib. 2. cap. 3. Dudo de Morib. et Actis Norman. pag. 98 :

Confestim Willelmus quendam Tetgerum Tyronem domus suæ principem misit ad Heinricum Transrhenanum Regem, etc.

Idem pag. 103 :

Quem Hugo Dux, non reverenter, ut solitus erat, suscepit ; sed in parilitate suorum Tyronum tenuit.

Ruodlieb. fragm. 3. vers. 402 :

Compare tam fido tam miti tamque benigno,

Tali Tyrone regem seseque carere.

Adde fragm. 13. vers. 27.

Tyrocinare, Tyrocinium exercere. S. Gerardus Abbas Sylvæ majoris in Vita S. Adelardi Abbatis Corbeiensis n. 4 :

Tyrocinabatur in Palatio (Karoli) puer bonæ indolis.

Historia Translat. S. Guthlaci n. 19 :

Militabat et in expeditionibus ad tempus Tyrocinabatur.

Otto Frising. in Friderico I. Imper. apud Murator. tom. 6. col. 661 :

Ad seria tandem Tyrocinandi accingitur negotia.

Tironicare, Militare. Gloss. Isid. ubi Excerpta habent, Tyronizare, forte pro Tyronissare.

Tyro, Qui in arenam descendit, vel duello pugnat, Campio. Arnoldus Lubec. lib. 2. cap. 15. de Drogone, duellum inituro cum quodam Helia :

Dominus meus exibit ad vos cum Tyrone suo, completurus quod dixit.

Tyro, Miles, qui Militiæ cingulo recens decoratus est, et necdum in bellis vel torneamentis tyrocinium suum exercuit. Gloss. Lat. Gall. Sangerm. : Tyro, nouviau chevalier. Elmham. in Vita Henrici V. Reg. Angl. cap. 59. pag. 154 :

Tyro quidam, nuper per Regem in festo S. Georgii, apud Cadomum celebrato, secundum solempnes balneorum observantias, creatus in militem, etc.

Joan. Monachus Majoris Monast. de Gaufredo Duce Normanniæ, Milite creato :

Taliter ergo armatus Tyro noster, Militiæ postmodum flos futurus, etc.

Simeon Dunelmensis ann. 1150. de Henrico ejusdem Gaufredi filio recens Milite facto :

Et rex David, et Tyro Henricus Dux Normanniæ, etc.

Ita vocem Tyro usurpat non semel Matthæus Paris. pag. 371. 445. etc.

Tyrunculus, Eodem intellectu. Balderic. in Chron. Camerac. cap. 93 :

Post cujus (Ottonis) excessum Otto filius suus gloriosissimus, licet primævo flore Tyrunculus, etc.

Vide Neoptolemus.

Tyro, nude pro Vassallus, Miles, apud eumdem Balderic. cap. 83 :

Walterus Castellanus Tyro inhumanissimus

; idem Castri vassallus dicitur cap. 92.

Tyrocinium, Militia, Chevalerie. Gloss. Lat. Gall. Sangerm. : Tirocinium, nouvelle chevalerie, ou office de nouviau chevalier. Vita S. Arnulfi sæc. 6. Bened. part. 2. pag. 536 :

Quidam miles Aldemborgensis indigena, nomine Willelmus, statura et agnomine longus, habuerat filium jam adultum Tyrocinio mancipatum, etc.

Epist. Manfredi Reg. Sicil. apud Baluz. tom. 1. Miscell. pag. 486 :

Eundem.... in fontis cujusdam balneo sub novæ militiæ solennitate lavarunt, et per duos milites ab inde transeuntes, ut Tyrocinii decus celebrius ageretur, procuravere balneatum eundem militiæ cingulo decorari sub veste rubea.

Joannes Monachus Majoris Monasterii lib. 1. Hist. Gaufredi Ducis Norman. de ejusdem Militia :

Illucescente die altera, balneorum usus, uti Tyrocinii suscipiendi consuetudo expostulat, paratus est.

Infra :

Dies illa Tyrocinii honoris et gaudio dicata, etc.

Gaufredus Vosiensis in Chron. part. 1. cap. 58 :

Regem Scotorum Henricus (Rex Anglorum) apud urbem Petragoricam in prato Episcopali Militiæ cingulo redimivit, qui novus Miles 30. heroum liberos recentis Tyroninii consocios faciens, prosecutus est Regem.

Petrus de Vineis lib. 3. Epist. 20 :

Quia tamen Militiæ cingulum, quod reverenda sancivit antiquitas, nondum Serenitas nostra acceperat, die præsentis mensis Augusti, cum solennitate Tyrocinii, latus nostrum eligimus decorandum.

Tyrocinium, Torneamentum, ludi equestres, in quibus novi Milites armorum suorum tyrocinia exercebant. Litteræ Philippi Aug. reg. Franc. ann. 1221. tom. 5. Ordinat. pag. 143 :

Pro Tirociniis, torneamentis, expedicionibus, et aliis usibus eorumdem, etc.

Willelmus de Nangiaco in Vita Philippi III. Regis Francor. ann. 1279 :

Princeps Salernæ Carolus Regis Siciliæ illustrissimi filius, veniens in Franciam cum magno honore a rege et Baronibus est receptus, ac pro ejus amore et reverentia dedit licentiam Philippus Rex in ludis Tyrociniorum Milites exercendi.

Infra :

Ipse vero Rex per Tyrocinia, commonendo Milites ad probitatem, discurrens, etc.

Joan. de Beka in Ottone III. Episcopo Trajectensi :

Eodem anno Florentius Comes imperterritus multa Tyrocinia per diversas provincias frequentavit, de quibus præconium laudis acquisivit.

Infra, ait, eum, qui Militarem ordinem suscepturus erat, jurasse,

Tyrocinia non nisi causa Militaris exercitii se frequentaturum

. Sic Matthæus Paris. pag. 372. 493. 495.

Tirocinium, Stipendium. Vita S. Arialdi tom. 5. Jun. pag. 292 :

Cujus locum quidam clericus, nomine Lanfrancus protinus rapuit, refutato pro eo Tirocinio non modico, quod annuatim sumebat de pontificali domo.

Tyronia, pro Tyrocinium, Exercitatio militaris. Arnobius Junior in Psal. 106 :

Sicut Tyronia corpus exercet, ita animam divina præcepta instituunt.

Tyronatus, in leg. 21. Cod. Th. de Tyronibus (7,13.), pro eo tempore, quo tyrones militiam exercent.