ZABYRA. Abdias Babylonicus lib. 4. Hist. Apostol. pag. 46 :

Et haud mora collectis libris magicis, Zabyras plenas ad Apostolum attulit, cervicibus suis et discipulorum impositas, et cœpit eos ignibus coram eo comburere. Sed Jacobus prohibuit, ne forte odor incendii, inquit, vexet incautos. Appende Zabyris lapides, et plumbum, et mitte in mare.

Ubi Meursius emendat zabarias, ut fuerint ζαϐαρεῖα, Zabarum repositoria. Sed hic non agitur de loricis, nec de eorum thecis ; sed de cistis aut capsis : unde malim legere zabernas, quomodo ex MS. emendat Salmasius, et apud Ordericum Vitalem lib. 2. pag. 381. ubi eadem verba describuntur, legitur. Vide Zaberna.