1. ACTIO, Officium, ministerium, munus. Gallis Comission. Senator lib. 3. Epist. 25 :

Amamus publicis Actionibus personas inserere morum probitate conspicuas.

Victor. Utic. lib. 2 :

Censet primo tyrannus jussione terribili, ut nemo in ejus palatio militaret, neque publicas ageret Actiones, nisi se se Arianum fecisset.

Leo PP. Epist. 77 :

Ut... Andream ab Archidiaconi Actione submoveris.

Gregorius Turon. lib. 4. Hist. cap. 42 :

Pœninus vero hujus municipii Comitatum regebat, cumque ad renovandam Actionem munera Regi per filium transmisit, etc

. Fortunatus in Vita S. Medardi Episcopi cap. 2 :

Dicit ad Eleutherium quemdam comparem, quod publica in Actione comitivam adsumeret.

Charta Childeberti Reg. Fr. in Actis Episcop. Cenoman. pag. 222 :

Ut nullo unquam tempore Actionem Ducatus alter, nisi, ut dictum est, in ipso pago Cenomannico habere debeat.

Epistola Gogi 22. ex iis, quæ habentur tom. i. Hist. Franc. :

Saluto Flitomerem, qui sub præterito Sacerdote Actionem Ecclesiæ laudabiliter gubernavit.

Actio Comitatus, Patriciatus, Ducatus, apud Marculfum lib. i. cap. 8 ; Domesticorum Actiones cap. 39 ; Actiones domorum, in Concilio Carthag. I. cap. 6. Vide præterea Senatorem, lib. 6. Epist. 18, 25. lib. 7, Epist. 14. 22, lib. 8. Epist. 16. 20. 31, lib. 9. Epist. 4. et alibi non semel ; Gregorium M. lib. 8. Epist. 51 ; Gregor. Turon. lib. 5. cap. 48 ; Vitam. S. Bathildis num. 6 ; Vitam S. Sergii Mart. num. 1 ; Concil. Vernense ann. 755. cap. 16 ; Codicem Carolinum Epistola 54. etc.

2. ACTIO, Idem qui Actionarius infra, Gall. Agent, Commissaire, Procureur. Capitulare Sicardi Principis Beneventani ann. 836 :

Si autem aliquis præsumpserit Actionem occidere, utilitatem suam peragentem, ipsa persona omnibus modis tradatur.

** Vide Actionarius 1.

3. ACTIO, Canon Missæ, sic dictus,

quia in eo Sacramenta conficiuntur Dominica

, inquit Walafridus Strabo lib. de Reb. Eccles. cap. 22. Honorius August. lib. 1. cap. 8 :

Missa quoddam judicium imitatur ; unde et Canon Actio vocatur. Actio autem est causa, quæ in publico conventu coram Judicibus agitatur.

Idem cap. 103 :

Canon dicitur Regula, quia per eum regulariter fit Sacramentorum confectio. Hic etiam Actio dicitur, quia causa populi in eo cum Deo agitur.

Vide Hugonem a S. Victore lib. 2. de offic. Eccles. cap. 29 ; Bernonem Augiensem cap. 1. et Micrologum cap. 12 ; Catalog. summor. Pontific. edit. ab Henschenio in Prolegom. tom. 9. in S. Xisto :

Hic constituit, ut infra Actionem Sacerdotis, incipiens populus Hymnum decantaret, Sanctus, Sanctus, etc.

Hugo Flaviniacensis in Chronico pag. 234. de Victore II. PP. :

Hic agitur consecratus ab Ostiensi Episcopo, cum Missas apud S. Petrum diceret, infra Actionem judicio Dei percussus est.

Auctor Historiæ Trevirensis tom. 12. Spicilegii Acheriani pag. 245 :

Jussus est Missam celebrare, et Canonem, qui Secreta vel Actio dicitur, sicut cetera, excelsa voce decantare, etc.

Apud Menardum in libro Sacramentorum ex Codice Remensi describitur Benedictio nuptiarum, cujus initium ita concipitur, Incipit Actio nuptialis, et in ipso contextu occurrunt verba, infra Actionem, (ut et in Ritu ordinandi Episcopi apud Mabillonium tom. 2. Analect. pag. 472 ; in libris Sacramentorum Ecclesiæ Rom. lib. 1. cap. 26. ubi promiscue et infra Actionem, et infra Canonem scribitur, et in vita Aldrici Episcopi Cenomanensis pag. 150) ubi vir doctus existimat

Actionem nuptialem, esse celebritatem nuptiarum, quæ fit inter Missarum solennia

. Sed non advertit Actionem hoc loco esse Canonem ipsum Missæ, quæ in hac benedictione peragitur, cum certis aliquot precibus ac orationibus, quæ Canoni ipsi interseruntur, quibus exactis percomplebatur Canon plenarius, ut ibi habetur. Canon actionis in lib. 3. Sacram. Rom. Eccles. pag. 196.

5. ACTIO, Cognitio, observatio in Cod. reg. 4778. et apud Jæckium.