CONFESSUS moritur, qui ante mortem peccatorum absolutionem accipit simul et viaticum ; non Confessus vero qui moritur neutro percepto sacramento, ut fusius exponetur in voce Intestatio. Hinc Confessum facere in Tabulario S. Vincentii Cenoman. ministrare est illa duo sacramenta. Ibi legitur :

Perrexit Abbas Ranulfus apud castrum Bellimontis, et ibi visitavit Hugonem de Juliaco decubantem ægritudine, et fecit eum idem Abbas Confessum. Testes Amelina mater Hugonis et frater ejus Robertus.

Alio in loco ejusd. Tabularii :

Gervasius de Monte Betonis dedit S. Vincentio quidquid habebat in Ecclesia de Monte Betonis. Hoc factum fuit apud Carnotum, ubi idem Gervasius in quadam gravi infirmitate detentus, a Christiano Monacho S. Vincentii visitatus est. Testes Judikellus Presbyter S. Martini de Valle, qui prædictum Gervasium fecit Confessum.