Inscriptio, Accusatio. Lex Burgund. tit. 77. qui est de Inscriptionibus :

Quotiens servus vocatur in crimine, et necesse est ut judicio sub Inscriptione tradatur, etc. Vinculum Inscriptionis,

in Edicto Theoderici Regis § 13. in Capit. Caroli M. l. 7. c. 338. 436. et in Libello Attonis Episc. Vercel. de pressuris Eccl. tom. 8. Spicil. Acher. pag. 47. dicitur illud, quo accusator se erga accusatum constringit, si in probatione deficiat, ut pœnam reciproci subeat : seu, ut habet Edictum Theoderici, quo

cavet apud competentem judicem, se eam pœnam subiturum, si non probaverit, quod intendit, quam possit reus convictus secundum leges excipere, ita ut usque ad eventum judicii, tam reus, quam accusator æquali custodiæ sorte teneantur

. Quomodo etiam Inscriptio sumitur in Formulis Lindenbrog. 117. 118. Lex 14. Cod. Th. de Accusat. et inscript. (9, 1.) :

Qui vel internecivi exerit actionem, vel crimen suspectæ mortis intendit, non prius cujuscumque caput accusatione pulset, quam vinculo legis astrictus, pari cœperit pœnæ condiditione jurgare.

Vide leg. 2. de Abolit. eod. Cod. (9, 37.) et tit. Cod. de Accusationibus et inscriptionibus (9, 2.)

Inscriptiones, Documenta, instrumenta donationum. Concilium Cloveshoense ann. 800 :

His dictis, prolatæ sunt Inscriptiones Monasterii, quod vocatur Cotham, terrarumque sibi adjacentium.

Occurrit ibi semel ac iterum. Inscriptionis titulo aliquid concedere, in Lege Longob. lib. 1. tit. 34. § 2. Carol. M. 123. per Chartarum confectionem. Charta Henrici Imp. ann. 1056. tom. 1. Italiæ sacræ part. 1. pag. 501 :

Insuper confirmamus nostra præceptali pagina omnes Inscriptiones communitatum, quas prænominatus Episcopus Bernardus secundus a bonis hominibus in præteritis temporibus acquisivit, etc.

Adde pag. 896. et tom. 4. pag. 807.

Inscriptum, Eadem notione. Diploma Hugonis Comitis Campaniæ, tom. 5. Annal. Benedict. pag. 672. col. 1 :

Sicut scripta ita Inscripta quæ hactenus tenuit Molismensis Ecclesia, fixa permanere decerno.

Falsæ Inscriptiones,

phylacteria, aut ligaturæ, quæ imprudentes pro febribus, aut aliis pestibus adjuvare putant

, in Capit. Caroli M. lib. 6. cap. 72. Serenus Sammonicus :

Inscribes chartæ, quod dicitur Abracadabra.

Ejusmodi Inscriptiones habet passim Marcellus Empiricus lib. de Medicam. Edit. 1536. pag. 58. 85. 87. 110. 112. 143. 154. 155. 156. 207. Vide Gruter. 1047. 5. Scribit Ammianus Marcellinus lib. 16. pag. 72 :

Anilia ista incantamenta ad leniendum dolorem medicinæ admisisse auctoritatem.

Atque inde tam crebro ea in medicorum libris occurrunt. Vide Character.

Inscripti Lapides, et Inscriptiones, pro terminis, apud Agrimensores.