1. RODA, Anglis, Quarta pars acræ, quæ et Farding deale, seu Farundel dicitur, juxta Cowellum, ex Anglico Rodd, Pertica. Continet autem acra, secundum stadii longitudinem 40. rodas, seu perticas ; in latitudine tantum quatuor. Perinde etiam Roda terræ 40. perticas in longitudine, unam vero solummodo in latitudine. Si autem excreverit Rodæ latitudo, contractior fit illius longitudo ; ita tamen ut in omni superficie, neque plus neque minus quam 40. perticas complectatur ; ita acra ultra citrave 160. Occurrit passim, apud Prynneum in Libertat. Eccl. Angl. tom. 3. pag. 1271. in Monastico Anglicano tom. 1. pag. 245. 302. 469. 636. 639. tom. 2. pag. 40. 82. 87. 93. 251. 291. 354. 445. 544. apud Willelmum Thorn. ann. 1288. 1317. etc. Idem pag. 2105. Rodam et Virgatam confundit. Vide Graff. Thesaur. Ling. Franc. tom. 2. col. 491. voce Ruota.

2. RODA, Rota, Trabs arcuata ad proram, Rode nautis maris Mediterranei. Informationes Civitatis Massil. de passagio transmarino e MS. Sangermanensi :

Primo habebunt galeæ per carenam xliiii. goas ; item de Roda en (in) Roda lii. goas et mediam.

Et infra :

Primo habebit quodlibet vysserium xliiii. goas in carena ; item de Roda in Roda liii. goas.

Rursus infra :

Primo habebunt (alia ligna) de carena xl. goas ; item de Roda en Roda l. goas.

Ibidem :

Item de Rota in Rota sine longitudine xlv. goas.

3. RODA, pro Rota, Gall. Roue. Reparationes factæ in Senescallia Carcassonæ ann. 1435. e MS. D. Lancelot :

Item pro faciendo unam Rodam totam novam, et præparando unum Rodetum in dicto molendino, etc.

Pluries occurrit ibi.

4. RODA, Mensura lignaria, idem videtur quod Carrada. Necrol. Casal. MS. :

Obiit domnus N. de Castellione comes Blesensis, qui dedit priori de Nantolio duas Rodas ligni ad calefiandum.

5. RODA, Piscis genus. Locus est supra in Citula. Vide Rodius.