ASCOMANNI, Piratæ, forte dicti ad instar Arabum Ascitarum, quibus id nominis inditum, quod utribus, seu naviculis, ex utribus confectis, piraticam exercerent : voce hybrida ab ἀσϰός, utris, et man, homo, nam et ascum pro navicula usurpat Lex Salica. Aliter tamen censet Jacobus Eyndius in Chronico Zeland. lib. 1. quem consule pag. 164. Adam Bremensis cap. 73 :

Classis Piratarum, quos nostri Ascomannos vocant.

Cap. 212 :

Ipsi enim Piratæ, quos illi Witingos leg. Wicingos appellant, nostri Ascomannos, Regi Danico tributum solvunt.

Horum præterea meminit cap. 111. Albertus Stadensis ann. 788. et Historia Archiep. Brem. in Bezelino. Vide Ascus. Glossat. Poetæ Saxon. ad ann. 800. v. 11. Northmanni, pyrate, Ashmen, apud Pertz. vol. 1. Mon. Hist. pag. 257.