BICHINI, Fraticellorum, seu Minoritarum secta, de qua infra in Bizochi. Videntur autem ita appellati, quod vestes coloris bigii, seu grisei, deferrent, quod faciunt etiamnum Minoritæ omnes. Nam Bigio, ut vult Albertus Acharisius, e specie di panno grosso. Dantes in Purgat. cap. 20 :

Fuor ch'uno renduto in panni bigi.

Petrarcha :

E i neri fraticelli, e i bigi, e i bianchi.

Id est, qui vestiebantur panno griseo, ut Minoritæ. Ex bigii autem Bighini, et Bichini voces formatæ videntur, dictique Fraticelli isti panno Bighino induti. Nec scio an nostrum Bis, pro subfusco, vel griseo inde ortum habeat. Fieri denique potest, ut Bichini iidem sint qui Beghini, et ita per contemptum appellati fuerint Fraticelli isti hæreseos perinde insimulati.