CABAGIUM, Census, quem homines de corpore seu de capite quotannis debebant domino præstare ; nisi idem sit quod Pastus et Procuratio, quæ in præstationem pecuniariam sæpius commutabatur ; cui interpretationi favet Charta senesc. Tolos. ann. 1323. in Reg. 62. Chartoph. reg. ch. 252 :

Item in Cabagio seu corrogio dictorum locorum de Assoali et de Bartis..... xj. libras, xviij. den. Turon.

Nec repugnant omnino Libert. villæ de Florent. ann. 1358. tom. 8. Ordinat. reg. Franc. pag. 87. art. 3 :

Quod omnes habitatores dictæ villæ..... sint liberi, quicti et immunes a quibuscumque subsidio, imposicione, gabella, redibencia, Cabagio, exactione nobis impendendis.

Libert. civit. Agen. ann. 1369. in Reg. 198. ch. 545 :

Concedimus quod dicti cives... sint quitti... a solucione cujuscumque leudæ, maletoltæ, foragii, Cabagii, doni, mutui, decimæ, etc.

Occurrit præterea in Lit. ann. 1369. tom. 5. earumd. Ordinat. pag. 388. art. 2. et apud La Faille tom. 1. Annal. Tolos. pag. 98. Vide Capitale 5. et Conredium.