CRUCESIGNATI, Qui sacræ Crucis militiæ nomen dabant, Gall. Les Croisez. De his infra post vocem Crux, lin. Crucem assumere. Verum alii fuerunt Crucesignati apud Tolosanos ; sic enim appellabantur, qui ab Inquisitoribus comprehensi et carceri aliquandiu mancipati propter hæresim, tandem erroribus abjuratis, pœnitentia et absolutione receptis, liberi dimittebantur. Inter pœnitentias impositas prima recensetur Crux, quæ simplex † aut duplex ‡, ante et retro, pro delictorum ratione erat deferenda. Harum crucium formam expressam habemus in libro Sententiarum Inquisitionis Tolosanæ a Philippo Limborch. edito pag. 13 :

Imponimus et injungimus pro pœnitentia duas cruces de filtro crocei coloris portandas, unam anterius et aliam posterius in omni veste vestra, præterquam in camisia... quarum quantitas in longitudine sit duorum palmorum et dimidii brachium unum, et duorum palmorum brachium aliud, scilicet transversale et trium digitorum in latitudine utrumque brachium.... Et quia tu Matthæe, etc. amplius deliquistis..... superaddimus vobis, quod cruces, quas vobis imponimus, sint duplices.

Vide Crux lin. Cruces binas.