1. ELECTUARIUM. Isidorus lib. 4. cap. 9 :

Electuarium, vocatum eo, quod molle sorbeatur.

Matth. Silvaticus :

Electuarium, id est, mollis sorbitio.

Ex Græco ἐϰλειγματάριον ab ἐϰλείχειν, delingendo evacuare. Alii ab electis speciebus dictum volunt. Joann. de Janua : Electuarium dicitur ab electione rerum, e quibus conficitur. Electuariorum alia sunt dulcia, quædam amara, quædam acria, de quibus Champerius. Octavius Horatianus lib. 4. Rer. medicar. :

Ad Tussim, Electuarium, etc.

Cæsarius lib. 7. cap. 48 :

De pyxide, quam in manu portabat, Electuarium per cochlear hauriens, singulis in os mittebat.

Brocardus in Descript. Terræ Sanctæ :

Habent poma citrina magna, ex quibus optima conficiunt Electuaria.

Statuta Ecclesiæ Cadurc. ann. 1289. inter Anecdot. Marten. tom. 4. col. 699 :

Parasti species vel Electuaria, non causa medicinæ, sed ut vinum tibi melius saperet, et ad bibendum te fortius incitaret.

Statuta Arelat. MSS. art. 137 :

Non vendant Electuarium corruptum.

Vide Constitut. Siculas lib. 3. tit. 34. § 4. Durandum lib. 6. Ration. cap. 7. num. 20. etc. Utuntur passim Medici. Guiotus Pruvinensis in Biblia MS. de Medicis :

S'ils reviennent de Monpellier,

Lor Lectuaire sont moult cher ;

Los, dient-ils, ce m'est avis,

Qu'ils ont gigimbrat et pliris, etc.