EXCEPTORIA, Exceptorium. Gloss. Isid. et Glossæ MSS. Ecclesiæ Paris. : Exceptoria, cisterna, lacus, collectoria. Papias : Exceptorium, collectorium, lacus. Gloss. Gr. Lat. : Ἐϰδοχεῖον, Exceptorium. Hoc sensu cisternas δεξαμενὰς vocant Græci Gloss. Gr. Lat. : Δεξαμενή, Cisterna, lacus. Hesychius :

Δεξαμεναί, ὑδάτων δοχεῖαι. Exceptoria aquarum,

Ecclesiastic. 39. 22. ubi Mamotrectus, receptacula. Gr. Interpres, ἀποδοχεῖα ὑδάτων. Itinerarium Hierosolym. :

Sunt ibi et Exceptoria magna aquæ subterraneæ et piscinæ magno opere ædificatæ.

Infra :

Ibidem modo jussu Constantini Imperatoris basilica facta est,... habens ad latus Exceptoria, unde aqua levatur, et balneum a tergo, ubi infantes lavantur.

Siculus Flaccus :

De superioribus vicinisque agris defluentes aquas Excipiunt, ne inferiores terræ laborent.

Cæsarius Arelat. Serm. 9. ad Monachos :

Ecce præparo Exceptorium cordis mei influenti per vos aquæ divinæ, etc.