FORCAGIUM, Forciagium, Fortagium, Fortiagium, Fortigium, Voces, si bene conjecto, ejusdem notionis, quæ exactionem significant, forte sic dictam, quod dominis ad arcium, quas Fortias vocabant, construtionem munitionemque exsolverentur. Charta Andreæ de Vitreio apud Lobinellum tom. 2. Hist. Britan. col. 212 :

Dedi Majori-Monasterio .... decimas omnium meorum reddituum .... præter talliam meam et Forcagium.

Tabularium Ecclesiæ Macloviensis :

Oliverius de Dinanno quitavi Burgensibus S. Maclovii consuetudinem et Forcagium lignorum merinsmentorum, quod ego capere faciebam in villa mea de Plancoit.

Histor. Abbatiæ S. Albini Ord. Cisterc. MS. per Guillelmum Gauthier cap. 6 :

Gervasia domina Dinanni exemit Guillelmum filium Radulphi... ab omni exactione et tallia, coustumiis, bocellagio, Forciagio.

Litteræ Johannis Regis Franc. ann. 1354. apud Marten. tom. 1. Collect. Ampliss. col. 1470 :

Retentis insuper in præmissis donatis nobis et successoribus nostris Franciæ Regibus recognitione et homagio, ac superioritate et resorto, et quod in villis, castris et locis prædictis, et aliis quibuscumque dicti Comitatus, Fortagia et alia quæcumque subsidia indicere poterimus.

Testamentum Gaufridi Tournemine ann. 1264. ex Archivo S. Albini de Nemore :

Item volo, quod illa Fortiagia et auxilia, quæ levavi et posui in parochia de Pludelia... penitus dimittantur.

Litteræ Innocentii IV. PP. pro Monasterio Calensi in Tabulario ejusdem loci :

Ut de iis quæ aliquotiens emere pro vestris utilitatibus vos contigerit, nulli pedagia, winagia, rotatica, traversa, roagia, pesagia, minagia et Fortigia, quæ pro hiis a sæcularibus exiguntur, solvere teneamini, auctoritate vobis præsentium indulgemus.

Vide Foriscapium. Vide infra Forchagium.