INTROITUM, Introitus, Gall. Droit d'Entrée. Julianus antecessor Nov. 123. cap. 1 :

Gratis autem nullatenus volumus sumptus accipere milites a collatoribus, licet minime apparatæ fuerint eis annonæ : neque autem Introita a collatoribus exigenda esse permittimus, quos inlæsos et indemnes undique conservari justum est. Introitus,

præfert Editio Gr.

1. INTROITUS, Quod a Clericis dignitates vel functiones Ecclesiasticas ineuntibus, Patronis Ecclesiarum præstatur. Concilium Viennense ann. 892. can. 4 :

Et ut nulli census a Presbyteris ad Introitum, ut dicitur, Ecclesiarum exquirantur, aut vi aliqua extorqueantur ;

a Laicis nempe Patronis Ecclesiarum. Rotomagense ann. 1074. can. 1 :

Ut omnis simoniaca hæresis funditus eradicetur, ita quod neque Abbatia, seu Archidiaconatus, aut Ecclesia Parochialis ematur, aut vendatur, aut aliquid pro Introitu Ecclesiæ expectetur.

Vide Introgium et Introitum.

2. INTROITUS, Tributum, quod in civitatem et oppidorum introitibus pensitatur. Charta Philippi Regis Franc. ann. 1310. pro libertatibus Bastidæ in Petragoricis, ex 47. Regesto Tabularii Regii num. 38 :

Quilibet mercator extraneus habens trossellum vel plures trossellos in dictis nundinis, dabit pro Introitu et excitu et pro leuda 4. denar.

Annal. Genuens. ad ann. 1214. apud Murator. tom. 6. col. 406 :

Constituerunt quod denarios quatuor per libras de collecta maris incantarent usque ad annos sex et de illis denariis redimerent Introitus marcharum, pedagii Gavii... et demum universos Introitus Communis Januæ, quæ omnia vendita erant per longum tempus.

Ibid. col. 407 :

Ipsi vero consules juraverunt, quod dicti Introitus de cetero in perpetuum non possent vendi nec obligari seu alienari alicui personæ seu personis ultra annum unum tantum.

Vide Intrata 3.

3. INTROITUS, ut supra Intrata 2. Quilibet redditus. Bulla Bonifacii IX. PP. ann. 1396. qua Johannellum et Andream Thomacellos Milites Neapolitanos instituit Vicarios et rectores Civitatis Ortanæ ejusque Comitatus et territorii, apud Illustr. Fontaninum ad calcem Antiquit. Hortæ pag. 442. et 443 : (Habeatis potestatem)

colligendi, habendi ac vestris... usibus applicandi omnia et singula consueta et debita telonia, pedagia, jura et emolumenta, fructus, redditus et proventus et Introitus, quocumque nomine censeantur... ita tamen quod de hujusmodi consuetis, debitis, teloniis, pedagiis, juribus, fructibus, redditibus, proventibus, Introitibus et emolumentis aliis quibuscumque..... teneamini dictam civitatem ejusque comitatum... vestris sumptibus.... custodire, reparare, etc

.

5. INTROITUS, Antiphona, quæ a Choro canitur, dum Pontifex procedit ad altare, quæ in Missa Ambrosiana Ingressa dicitur. Papias : Introitus dicitur, quod per eum introimus ad ejus officium, versus, quo per eum revertimur ad Intritum, Walafridus Strabo cap. 22 :

Antiphonas ad Introitum dicere Celestinus PP. instituit, etc.

Amalarius lib. 1. de Eccles. Offic. cap. 5 :

Officium, quod vocatur Introitus Missæ, habet initium a prima antiphona, quæ dicitur Introitus, et finitur in oratione, quæ dicitur ante Lectionem.

Introitus Missarum alii sunt regulares, qui quotidie ex more cantantur : alii irregulares, qui secundum varietates solennitatum instituti sunt, ut Puer natus, etc. Vide Honorium Aug. in Gemma animæ lib. 1. cap. 87. et Durandum lib. 4. cap. 5. Glossar. med. Græcit. voce Εἴςοδος, col. 358. sqq.

6. INTROITUS, Præsentia, Gall. Assistance. In Obituario MS. eccl. Rotomag. ad diem 16. Dec. legitur :

O sapientia. Dominus cancellarius, cuilibet vj. den.

Recentiori manu additur : Fit introitus ; quod explicatur ad diem 27. ejusdem mensis in festo S. Joan. Evang. :

Omnes sacerdotes tenentur facere Introitum in Matutinis sub pœna de v. sol.

Vide supra Intrare ad Matutinas.