1. MARITATIO, Idem quod Maritagium, Dos. Charta Henrici I. Regis Angl. pro Libertatibus Angliæ in ejusdem Legibus, apud Ricardum Hagustald. Matth. Paris. Bromptonum et alios :

Et si mortuo marito uxor remanserit ejus, et sine liberis fuerit, dotem suam et Maritationem habebit,... et si uxor cum liberis remanserit, dotem quidem et Maritationem suam habebit, dum corpus suum legitime servaverit, etc.

Charta ann. 1088. apud Miræum tom. 1. pag. 458 :

Quod contingit ex capite matris meæ, meæ Maritationis sorte offerendum credo in illa domo.... prædium mihi competens jure matrimonii, etc.

Testament. Johannis de Nevill ann. 1386. apud Madox Formul. Anglic. pag. 429 :

Item lego pro Maritatione Elizabeth filiæ meæ, si fuerit superstes, mille marcas.

2. MARITATIO, Tributum, quod dominus, nomine Auxilii, a vassallis et subditis, pro maritanda primogenita filia sua, ex Lege et Consuetudine, exigere poterat. Charta ann. 1153. apud Lobinell. tom. 2. Hist. Britan. pag. 157 :

Præterea rogaverunt me supradicti monachi ut eis quasdam Consuetudines, quas eis dominus Gaufredus pater meus dederat, confirmarem, scilicet censum, ostagium, Comitis esum, Muritationem, terre emptionem, corporis sui redemptionem.

Ex quibus ultimis verbis perspicuum est vocem Maritatio ea, qua exposuimus, notione, hic intelligendam esse ; ne quis vero remaneat scrupulus, vide Auxilium. Verum, quod omnino notandum est, videtur ex allatis tributum illud etiam pensitatum fuisse, ubi nulla aderat maritanda filia, quandoquidem monachis, ut eo utantur, concessum videmus. Unde alicubi quasi censum annuum exactum fuisse lubens crediderim. Vide supra in Maritagium.

3. MARITATIO, Matrimonii celebratio. Chron. Guill. Burdini ad ann. 1303. inter Probat. tom. 4. Hist. Occit. col. 11 :

Quod pro baptismate, Maritatione et unctione sancti olei a parrochianis duos vel tres vel quatuor denarios solent (clerici) exigere.