Plebes, Laicorum ordo. Glab. Rodulph. in prol. tom. 10. Collect. Histor. Franc. pag. 1 :

Quæ videntur fieri tam in ecclesiis Dei, quam in Plebibus, minime abdenda, etc.

Vide supra Plebeïus.

Plebes, Diœcesis, parœcia, districtus Episcopi vel Sacerdotis. Lucifer Calaritanus lib. 1. pro S. Athanasio :

An negabis, te exhonorasse Dominum, tollendo Sacerdotes e Plebibus, quos ordinavit ille ?

Idem lib. 2 :

Tulisti Episcopos e Plebibus.

Concilia Afric. can. 20 :

Statutum est, ut Plebes, quæ in diœcesibus ab Episcopis retinentur, quæ Episcopos nunquam habuerunt, non nisi cum voluntate ejus Episcopi, a quo tenentur, proprios accipiant Rectores, id est, Episcopos.

Quo loco Codex Canon. African. cap. 53. habet τὰ πλήθη. Capit. 72. λαοί. Collatio 1. Carthagin. cap. 65 :

Nam in Plebe mea, id est, civitate Constantinensi, adversarium habeo Fertunatum.

Concilium Milevit. cap. 21 :

Placuit, ut quicumque Episcopi quascunque Ecclesias vel Plebes, quas ad suam cathedram æstimant pertinere, non repetierint ut causas suas, etc.

Concilium Carthag. VI. cap. 2 :

Faustinus Episcopus Plebis Potentinæ, provinciæ Italiæ.

Charta ann. 1206. in Tabul. castri Blein. :

Dedi B. Matthæo tres peceatas frumenti in perpetuum possidendas in tribu Mœenvili, quæ est in Plebe Ugon.

Vide Concilium Carthag. I. can. 5. 7. 12. Carthag. III. can. 20. Acta Synodi Carthag. ann. 525. tom. 6. Spicilegii Acheriani pag. 5. 7. 9. 10. Canones S. Patricii cap. 24. 33. Capit. Caroli M. lib. 6. cap. 236. 308. Concilium Ticinense ann. 855. etc.

Plebes, Ecclesia parochialis ; Italis Pieve. Ecclesia plebi congrua, in Charta Angilrami Archiep. Viennensis tom. 12. Spicilegii Acheriani.

Ecclesiæ baptismales, quas Plebes appellant

, in Synodo Pontigonensi ann. 876. cap. 11.

Plebes baptismalis

, in Charta veteri apud Ughellum tom. 3. pag. 41.

Ecclesia Plebalis seu parochialis

, in Chronico Reichesperg. ann. 1084. 1095. 1131. 1132. Synodus Romana ann. 826. cap. 8 :

Episcopi in subjectis baptismalibus Plebibus, ut certe propriis, diligenter curam habere debent.

Cap. 16 :

Nulli Episcoporum liceat res immobiles de subjectis Plebibus, seu aliis locis piis in proprio usu habere, etc.

Concilium Valentinum III. ann. 855. cap. 17 :

Ut ipsa visitatio Plebium et parochialium Sacerdotum... juxta canonicam institutionem fiat, etc.

Joannes Gualbertus Vallis Umbrosæ Abbas in Epist. :

Dum autem parochias per Ecclesias baptismales, quas Plebes vocant, Episcopus circuit, etc.

Synodus incerta ann. 904. cap. 12 :

Ut singulæ Plebes Archipresbyterum habeant... qui non solum imperiti vulgi sollicitudinem gerant, verum etiam eorum Presbyterorum, qui per minores titulos habitant, vitam jugi circumspectione custodiant.

Adde Synodum Pontigonensem cap. 7. Bulla Joannis IV. PP. apud Ughellum in Episcopis Aesernensibus :

Ædificavit Ecclesiam vocabulo S. Mariam, eamque in Plebem erectam dotavit suis propriis bonis.

Bulla Paschalis II. PP. apud Herimannum de Restaurat. S. Martini Tornacensis cap. 87 :

Illis tantum Ecclesiis, quæ Plebes dicuntur, deberi decimas indicat.

Domnizo lib. 1. de Vita Mathildis cap. 16 :

Sed et omnis Episcopus urbis Plebes vendebat, quas sub se quisque regebat.

Idem lib. 2. cap. 1 :

Plebes, capellas, precio clericis tribuebant.

Adde Bullam Innocentii PP. ann. 1070. apud Franc. Mariam in Mathildi lib. 3. Innocentium III. lib. 13. Epist. 178. etc. Vide Muratorii Dissertat. 74. in Antiq. Ital. med. ævi tom. 6. col. 359. sqq.

Plebes. Villas seu vicos parœciales plebium nomine appellare familiare est Britonibus. Vita S. Conwoionis sæc. 4. Bened. part. 2. pag. 194 :

Ille Conwoion quem quæris, filius cujusdam nobilissimi est viri, nomine Cononi,... de Plebe Camliciaca, ex genere senatorio.

Ibidem pag. 201 :

In illo die tradidit supradictus Nominoe quartam partem Plebis Bain sancto Salvatori... Placuit ei (Ludovico Imper.) quod Nominoe fecerat :... insuper etiam totam Plebem Bain, sed et aliam Plebem, nomine Lancum, tradidit.

Ita hanc vocem apud Britones sæpius usurpatam iterum evincit Hist. Roton. Monast. lib. 1. cap. 48. etc. Hinc

Plebicula, Ecclesiola, vel potius viculus, villula. Vita S. Conwoionis mox laudata ibidem pag. 203 :

Illo vero die dedit Ludovicus Imperator abbati Conwoiono plebem, quæ dicitur Rannac, atque aliam Plebiculam, quæ vocatur Placia, necnon et aliam Plebiculam quæ nuncupatur Ardon.

Charta Junkeni Archiepiscopi Dolensis, apud Augustinum du Pas :

Quandam Plebiculam, Gwerwidel nomine, cum silvis, aquis, etc.

Alia ann. 1101. apud eumdem pag. 624 :

Nec non quandam Plebiculam, quæ vocatur Alarac, quæ erat dedita victui dictæ Congregationis, ditioni Prioris qui præesset illi loco, in perpetuum contulit.

Plebs, Conventus publicus. Leges Lotharii cap. 13. apud Muratorium tom. 2. part. 2. col. 138 :

Ostendatur (Charta) ante Episcopum, et Comitem, et judicem vel vicarios, aut in Plebe, ut veraces esse cognoscantur.

Plebs Parva, Plebecula, Gall. Populace, petit peuple. Charta apud Lobinellum tom. 2. Histor. Britan. pag. 555 :

Et cum gentes parvæ Plebis et alii ponerent paleas et pannos in via sua, etc.

Plebes, dicta etiam Ecclesia Cathedralis seu Episcopalis. Charta Caroli Calvi pro Ecclesia Parisiensi in Pastorali minore Eccl. Paris. et in 9. Regesto Philippi Pulcri Reg. Franc. ch. 5. ex Tabul. Regio :

Ideoque dum pluribus habetur præcognitum, qualiter Ecclesia Parisiaca, quæ est in honore S. Mariæ matris Domini nostri Jesu Christi, et S. Stephani Protomartyris, et S. Dionysii, et S. Germani, et S. Marcelli, vel S. Clodoardi Confessoris, vel cæterorum dominorum, quorum pignora in ipsa Plebe vel in ipsa Ecclesia Parisiaca adunate requiescunt, etc.

Occurrit ibi non semel. Ubi plebem malim de diœcesi seu districtu Episcopi interpretari ; quod cuique attente legenti patebit.

Plebes, Decimæ Ecclesiasticæ, quæ ad plebanos vel ad plebanas Ecclesias pertinent. Concilium anonymum anno 904. cap. 10 :

Ut Plebes Ecclesiæ nullatenus aut Comitibus, aut Episcoporum vassallis, aut ullis Laïcis in beneficia tribuantur.

Petrus Damian. lib. 4. Epist. 12 :

Sunt etiam qui Plebes sæcularibus tradunt.

Et mox :

Quid est enim decimas in usum sæcularium vertere, nisi mortiferum eis virus, quo pereant, exhibere ? huc accedit quod et Plebesanis justa datur occasio, ut matricibus suis Ecclesiis obedientiam subtrahant, ut non eis legitima decimarum tributa persolvant.

Vide Altare 1.

Plebanus, Parœcus, curio, Sacerdos, qui plebi præest, Italis Piovano, Gallo-Belgis Pleban. Balbus in Catholico :

Plebanus, dominus plebis. Presbyter, qui plebem regit,

apud Gregorium lib. 3. cap. 3. Burchardus de Casib. S. Galli cap. 21 :

Immo etiam Plebanos et Clericos minoris ordinis cohibuit. Sacerdos plebanus,

in Chronico Reichersperg. ann. 1144. Clerici plebani, eidem Burchardo cap. 13. Charta Henrici IV. Ducis Slesiæ ann. 1288. apud Ludewig. tom. 5. Reliq. MSS. pag. 427 :

Dominus Petrus notarius noster olim Plebanus in Olsnitz, nunc autem Præpositus S. Crucis.

Occurrit præterea in Charta ann. 1196. inter Probat. tom. 2. novæ Hist. Occitan. col. 498. Vide Annona missalis. et Haltaus. Glossar. German. voce Leutpriester, col. 1265.

Viceplebanus, Curionis Vicarius. Vide Gretzerum in Episcopis Eystetensibus pag. 458. Socius Plebani dicitur in Statut. eccles. Francof. apud Würdtwein. in Subsid. Diplom. tom. 1. pag. 22 :

Forma Juramenti Sociorum Plebani... Ego N. juro... quod omnia et singula officio seu ministerio Plebanatus hujus ecclesiæ incumbentia quantum michi committentur, exerceam et respiciam fideliter et diligenter, etc.

Plebesanus, apud Petrum Damian. lib. 4. Epist. 12. et apud Rainerum contra Valdenses cap. 9.

Plebalis Ecclesia, Parœcia. Gerohus Præpos. Reichersperg. de corrupto Eccl. statu apud Baluz. tom. 5. Miscell. pag. 217 :

Qui vero sine lege claustrali sub lege sunt canonum, sive ab Episcopo, sive ab Abbate, vel Præposito in ecclesiis Plebalibus ponantur, secundum canones ibidem stipendiandi sunt.

Plebana Ecclesia, Eadem notione, in Chron. Mellic. pag. 53 :

Dotavit (Leopoldus IV. Austriæ Marchiæ Mellicensem ecclesiam) quinque ecclesiis Plebanis, cum suis partibus decimationis.

Plebeia Ecclesia, Eodem significatu. Vita S. Audoeni Episc. Rotomag. apud Surium 24. Aug. pag. 259 :

Eadem cura et diligentia vicos publicos et Plebeias ecclesias fundavit.

Plebesana Parochia, in Vita Altmanni Episcopi Pataviensis sub finem :

Hæc cum solenni processione plebis Plebezanæ parochiæ, quæ Tuln vocatur, ad memoriam B. viri ducta venisset.

Litteræ Otakeri Styr. Ducis ann. 1188. apud Ludewig. tom. 4. Reliq. MSS. pag. 175 :

Capellas duas meæ ditionis quas a plebano fure absolutas... monasterio Admuntensi potestativa manu contradidi, eo tenore, ut si posthac Plebesana ecclesia in Liegnich... ab Admuntensi cœnobio ablata forte fuerit, etc.

Plebisanus, Qui Plebano subest, parochianus. Miracul. B. Wernheri tom. 2. April. pag. 726 :

Plebisanis ecclesiæ Bacheracensis, etc.

Plebanatus, Dignitas vel districtus plebani, Ugutioni et Balbo. Thomas Archid. in Hist. Salonitana cap. 19 :

Plebanatum Ecclesiæ S. Anastasiæ contulit nepoti suo.

Occurrit præterea apud Innocentium III. lib. 15. Epist. 198. 199.

Plebatus, Parœcia, districtus plebani. Charta Aimerici Episc. Cæsenat. ann. 1274. apud Ughellum tom. 2. Ital. Sacræ :

Insuper largior, do, trado... in perpetuum canonicam portionem testamentorum et aliarum ultimarum voluntatum de jure spectantium mihi meisque successoribus ab hac hora in antea in perpetuum per totum Plebatum dictæ plebis S. Mauri.

Latiori significatu, pro districtu nimirum Archipresbyteri ruralis, usurpatur in Vita B. Finæ Virg. tom. 2. Mart. pag. 241 :

Rector ecclesiæ S. Mariæ de Alica, Plebatus S. Gervasii, Lucensis diœcesis.