POSSESSORES, in Lege Salica tit. 43. § 7. dicuntur

qui res in pago ubi commanent, proprias possident :

Cives. Vide Savin. Histor. Jur. Rom. med. temp. tom. 1. § 18. et 94. Vetus Inscriptio Vincentiæ, apud Georgium Pilonum in Hist. Bellunensi pag. 16 :

Æterno Principi Fl. Clau. Juliano ubique venerando semper Aug. Ordo Possessoresque Brixillanorum optata devotione dedicarunt, bono reipublicæ nato.

Alia apud Franciscum Angelonum in Hist. Interamnensi pag. 36 :

Et Possessores, inquilini, negotiantes, viæ stratæ cultores, etc.

Sidonius in Panegyrico Majoriani :

......... quo disceret agro

Quid Possessorem maneat ?

Ita apud Byzantinos Possessores appellabantur, qui domos in urbe possidebant. Liberatus Diaconus cap. 20 :

Habens autem consentaneos aliquantos ex Clero, et Possessores civitatis, et corporatos, et milites, etc.

Diurnus Romanus cap. 3. tit. 2 :

Presbyteris, diaconibus, clericis, honoratis, Possessoribus, et cunctæ plebi ill. ecclesiæ, etc.

Vide Gregorium Mag. lib. 3. Dialog. cap. 26. Nec scio an de iis intelligendus sit Victor in Valente :

Fuit Possessoribus consultor bonus, mutare judices rarius, etc.

Atque ii sunt quos ϰτήτορας vocat Chronicum Alexandrinum duobus locis, qui ex eo quod domos in urbe possiderent, jure panum civilium et gradilium gaudebant, quod pluribus docemus in nostra Constantinopoli Christiana. Hesychio ϰτήτορες, ϰτισταὶ dicuntur, conditores. Hinc ϰτητοριϰὸν δίϰαιον apud Pachymerem lib. 8. cap. 21. extremo, jus quod alicui competit in Monasterio aliquo vel Ecclesia a se vel decessoribus condita, quod vulgo jus Patronatus dicimus, ut recte interpretatur eruditus Possinus. Vide quæ de hac voce annotavit vir immense doctus Joan. Bapt. Cotelerius ad tom. 1. Monument. Eccl. Græc. pag. 750.