◊ Sed proprie dicebantur Fratres Laici, seu seculares, qui abdicato seculo in Monasteria secedebant. Statuta Ordinis de Sempringham § de Secularibus Rendutis :

Seculares, qui se Reddiderint in domibus nostris, et omnem proprietatem reliquerint,... æqualem portionem habent, quemadmodum et alii nostri ordinis conversi. Super eos fratribus nulla potestas attribuitur, sed in labore æqualitas. Priori et Cellerario et Subcellario eorum obedientia assignetur, et cum dormierint in Domino, omnino eis officium exhibeatur sicut pro Canonico, pro arctiore vita, quam sibi elegerunt pro Christo.

Vide pag. 779. Statutum Philippi Regis Franc. ann. 1292. in Regesto Parlam. B. fol. 85. et apud Chopinum lib. 3. de Sacra Polit. tit. 5. num. 15 :

Ordinatum est, quod si Templarii, Hospitalarii, seu alii quicumque religiosi, ratione cujuscumque advocationis, doni, vel alterius cujuscumque emolumenti in fratrem seu Redditum suum aliquem seu aliquos receperint, et eum vel eos tanquam fratrem seu Redditum defendere et tueri voluerint, caveant gentes domini Regis.... ne aliquos tales privilegiis Templariorum et aliorum religiosorum quorumcumque gaudere, neque aliquos auctoritate dictorum privilegiorum vexari permittant, nisi dicti fratres se omnino Reddiderint, et deferant habitum eorumdem.

Adde Litteras Caroli V. Franc. Regis pro Monasterio S. Victoris Paris. ann. 1364. apud D. Secousse tom. 4. Ordinat. Reg. pag. 540. In Charta ann. 1282. in Hist. Monasterii S. Mariæ Suession. Gallica pag. 465. 466. Les Renduës, distinguntur a Dominabus, les Dames. Vide virum doctissimum Michaelem Germanum ejusdem Historiæ Scriptorem cap. 5.

◊ In Statutis Ordin. Cartusiensis crebra est mentio ejusmodi Redditorum, qui et Laïci et Donati, et Præbendarii dicuntur, quorum ordo Conversorum ordine inferior est, adeo ut si Conversus deliquerit, in ordinem Redditorum, regradetur, part. 2. cap. 31. cap. 12. part. 3. cap. 32. § 9. Redditorum tamen in eo potior est conditio, quod inter eos possit esse unus Clericus, qui tamen in habitu Redditi non possit ultra Diaconatum promoveri, part. 2. cap. 25. § 3. part. 3. cap. 33. Adde Statuta ann. 1368. part. 3. cap. 1. et 2. et tertia Statuta cap. 11. Ita porro ii sese Monasterio donabant, ut in professione, quam edebant, hanc clausulam apponerent :

Quod si aliquo tempore unquam hinc aufugere, vel abire tentavero, liceat servis Dei qui hic fuerint, me plena sui juris auctoritate requirere, et coacte ac violenter in suum servitium revocare,

apud Guigonem in Consuetud. Cartusiens. cap. 74. et in Statut. antiq. 3. part. cap. 24. § 5. Vide Oblati 2. Donati, Recepta 4. et Receptus 3.

◊ In Monasterio Saletarum, ubi Monachi pariter et Moniales instituuntur ab Humberto I. Dalphino Viennensi ann. 1299. Redditi Sacerdotes erant aut ad Sacerdotium promovendi. Fundatio hujusce Monasterii tom. 2. Hist. Dalphin. pag. 91 :

Quod in dicto Monasterio sint perpetuo et esse debeant ex tam Monachi quam Redditi Sacerdotes, vel parati ad Sacerdotium promoveri, et unus Vicarius de Ordine Cartusiensi et triginta Moniales ejusdem Ordinis. qui et quæ omni tempore Deo pro nobis et nostris serviant secundum statuta et instituta Ordinis supradicti.

Sed id peculiare fuit in hoc Parthenone, ubi pauciores erant Monachi vel Redditi, quos omnes pro Monialium utilitate Sacerdotes esse conveniebat.

◊ Fuerunt etiam Redditi in hospitalibus seu publicis Valetudinariis, qui voce Gallica Rendus vocantur in Charta ann. 1357. tom. 3. Histor. Harcur. pag. 299 :

Fuerunt sepulta per quatuor Rendus Magdalenæ (Hospitalis) Rothomagensis corpora D. de Graville, de Maubué in tribus arcis, quales fieri solent pro mortuis. Renduti

vero dicuntur in Charta ann. 1335. apud Menesterium in Probat. Hist. Lugdun. pag. xxv. col. 1 :

Ægrotis et Rendutis et aliis sibi servientibus in dicta (Hospitalis) capella, etc.

Conventiones habitæ inter Johannem Dalphinum et Hospitale S. Johannis Jerosol. Visiliense ann. 1317. tom. 2. Histor. Dalphin. pag. 161. col. 1 :

Versa vice præfatus D. Dalphinus in recompensationem dict. bonorum, sibi ex causa permutationis traditorum per prædictos Procuratores, eisdem dedit domum de Levata sita juxta castrum de Aybeno in Graysivodano, exhoneratam a leprosis Rendutis et a quolibet alio onere, excepto onere debito Prioratui de Domena.

Ex quo posteriori loco patet leprosos etiam aliquando inter Hospitalium Rendutos numeratos fuisse : quod cum ipsis Hospitalibus oneri esset, ab hoc onere liberatur Hospitale Visiliense.