RIGA 1, Glossarium mediae et infimae latinitatis, Du Cange et al.

« 1 riga » (par C. du Cange, 1678), dans du Cange, et al., Glossarium mediae et infimae latinitatis, éd. augm., Niort : L. Favre, 1883‑1887, t. 7, col. 187c. http://ducange.enc.sorbonne.fr/RIGA1

1. RIGA, Striga, sulcus terræ, ager sulcatus, nostris Roye, vel Raye de terre, vox formata forte a Rigor, de qua infra, id est, limes rectus, vel quicquid in rectum aratur. In Glossis MSS. Areola exponitur Riga hortorum. Ita porro videtur usurpare Concilium Duziacense I. part. 4. cap. 5 :

Nec unam Rigam de terra, nec ullum habebat mancipium proprium.

Vita S. Berthæ Abbat. Mart. num. 7 :

Cœpit terram fodere, et in modum sulci Rigam facere.

Et Charta Fulcoudi Abbatis S. Faronis Meldensis :

Anathematizavit cunctos, qui ex supradicta terra aliquam fraudem facere præsumerent, vel usque ad unam Rigam minuerent.

Edita est tom. 2. Hist. Eccl. Meld. pag. 9. et sæc. 4. Benedict. part. 1. pag. 659. unde Mabillonius in Onomastico ad calcem Rigam interpretatur Tributi genus a colono solvendum. Vide mox Riga 3. Charta Bartholomæi Laudunens. Episc. ann. 1117. Hist. Codiac. pag. 136 :

Unam carrucam terræ ad omnes Rigas donavit.

Iis in locis, in quibus quolibet triennio per annum requiescunt agri, solum integrum in tres portiones circiter æquales dividitur. In una frumentum hyemale seritur, in altera Martium, tertia requiescit. Has portiones Rigas appellat Bartholomæus loco citato, ut plerique nostrum Rayes etiamnum appellamus. Hac, ut puto, notione Codex MS. Irminonis

Abb. Sangerman. fol. 45. verso col. 2 :

Arant dimidiam Rigam.

Vide Roya.

les Bénédictins de St. Maur, 1733–1736.

Rigas Facere. Idem Codex MS. fol. 40. recto col. 2 :

Osarius colonus.... tenet mansum 1. habet de terra arabili bun. xxxv. facit inde Rigas et curvadas abbatiles et præpositiles.

Eodem fol. verso col. 2 :

Cricianus colonus.... habet de terra arabili bun. xii. solvit ad hostem multones 11. de spelta modios v. facit integram Rigam.

Et fol. 41. recto col. 1... :

Habent de terra arabili bun. xii. de prato arp. 1. solvunt similiter et faciunt duas Rigas supra.

Ubi Rigas facere idem est, ut videtur, quod Arare.

les Bénédictins de St. Maur, 1733–1736.

Rigis, Ager strigatus, Angl. Rig vel Ridge. Spelmannus in voce Riga :

Terram quam e pluribus sulcis in aggerem efferunt arantes, ita ut sicca sedes frumentis habeatur, Romani Strigam, atque inde agros Strigatos, nos a Rig vocamus.

Thomas Blount in Nomolexico :

Anno 20. Eliz. teste Jacobo Dyer Mil. unam acram terræ arabil. continen. quinque porcas terræ, Anglice Ridges.

Excambitio inter Moniales S. Michaelis de Stanford et Galfridum filium Lenverici de Brun, apud Thomam Madox Formul. Angl. pag. 155 :

Sciant præsentes et futuri..... quod idem G. excambiavit cum prædictis Monialibus viii. acras terræ arabilis, quarum II. Rigis jacent super Langeland et 11. Hevetlandes quæ capitant super easdem, super Soperestand IIII. rodæ et quinta roda, quæ tangit super Langeland, II. rodæ versus Aquilonem apud Hones, I. Rig. juxta Mabiliam Roberti filii Militis, vii. Rigis qui capitant super Lundam, II. Rigis juxta Robertum Calver, quæ capitant super Obestorpesgathe, I. Rig. juxta Reherium Lunet ; hac viii. acras, ex quibus xi. Rigis jacent juxta Have versus Aquilonem, etc.