STAURUM, Quidquid ad vitæ necessaria conducit, Anglis Store. Item, Quidquid ad agriculturam, vel ad prædii supellectilem pertinet, ut sunt animalia, pecora, servi, etc. Vide Stauramentum. Elmham. in Vita Henrici V. Regis Angl. cap. 68. pag. 195 :

Largifluæ Cereris copiosa fertilitas, cuncta sua granaria infra urbem omni Stauro spoliata perpendent, etc.

Chron. Joh. Whethamstedii pag. 505 :

A dextra, aut in prædiis, aut in grangiis, aut alicubi alibi in Stauro pro exhibicione vestra, etc.

Vita B. Edmundi Cantuar. Archiep. apud Marten. tom. 3. Anecd. col. 1823 :

Ad hæc Archiepiscopatus ære alieno ad septem millia marcarum obligatus extitit, quem præterea quasi totaliter in Stauro destitutum, et velut inanem et vacuum reperit et recepit.

Statuta Hospitalis S. Juliani in Anglia :

Item ad Festum S. Martini habebit leprosus quilibet porcum unum de Stauro communi.

Matth. Westmonaster. anno 1259 :

Viginti insuper et 5. libras dedit pro Stauro ejusdem loci.

Idem ann. 1303. De obsessis, qui ut obsidentes fallerent, frumentum et carnes suas in hostium cuneos projecerant :

En quos sperabamus fame periisse, in ejectione Stauri sui, con trarium experimur.

Henr. de Knyghton ann. 1355 :

Si papa posset dispensare cum eis habere granaria et cellaria pro Stauro reservando, etc.

Adde Kennett. in Antiq. Ambrosd. pag. 571. et Madox in Formul. Anglic. pag. 427. Vide Instaurum, et Restaurum.