1. TERCERIUM, Tertia pars, ut puto, Gallice Tiers, Ital. Terzo. Statuta Vercell. fol. 137. v° :

D. Ubertus Coarasa et filii... pro se et consortibus eorum pro duobus Terceriis habeant præcipuum modios 400. boschi mecleti.

Statuta Montis-regalis pag. 5 :

Syndicus Communis... in principio cujuslibet regiminis, eligi facere teneatur et debeat unum hominem literatum de quolibet Tercerio, qui sint de consilio, qui electi teneantur jurare in consilio, quod quotiescumque proponeretur in consilio, publico vel privato, aliquid contra formam præsentis capituli, quod denunciabunt, etc.

Pag. 33. et 34 :

Item stanciatores tres, unus pro quolibet Tercerio super victualibus, qui habeant pro eorum salario solidos 30. pro quolibet. Item duo prudentes homines pro quolibet Tercerio acconciatores discordiarum.

Rursum pag. 58 :

Dividatur dicta pecunia per syndicum communis de consilio novem sapientum, qui pro tempore fuerint inter massarios pontium et viarum Terceriorum secundum æstimum et registrum Terceriorum.

In hisce posterioribus Statutis tertiam partem urbis intelligo, seu regionem, quæ Tercerium dici potest, ut alibi Quarterium, Ital. Quartiere, nostris Quartier de ville.

2. TERCERIUM, Modus agri, idem quod supra Tercellum. Charta ann. 1220. ex Chartul. Miciac. :

Pro censiva vero eorum dedit eis in escambium tria arpenta terræ, uno Tercerio minus, etc.

Lit. admort. ann. 1376. in Reg. 109. Chartoph. reg. ch. 214 :

Item supra tria Terceria vineæ in duabus petiis, prope domum pictam xvj. sol. Item supra unum Tercerium vineæ,..... iiij. sol.

Vide Tertiarium.

3. TERCERIUM, Instrumentum, ut videtur, cujus percussione monachi ad officium divinum vocabantur, forte quod tribus malleolis constaret, sic dictum. Vide Tabula 4. Ordinar. MS. S. Petri Aureæ-val. ad feriam 2. Quadrag. :

Circa nonam horam fiat signum pro Sexta dicenda cum Tercerio, et signo facto conveniant fratres in choro et dicatur Sexta solum.